(17.03.2009 RV)Siç dihet, etapa
e ardhshme e udhëtimit të Benediktit XVI do të jetë udhëtimi në Angolë dhe një nga
temat që do të përshkojnë këtë shtegtim do të jetë gjendja e gruas afrikane. Për më
hollësisht mbi këtë pikë delikate të jetës dhe të shoqërisë afrikane në përgjithësi
flet Motër Zhoslin Kamba, e Kongregatës së Motrave të Shën Anës, e cila pikësëpari
përshkruan padurimin me të cilin po pritet vizita e Papës nga rregulltaret e këtij
vendi:
Përgjigje: Ne rregulltaret e Kamerunit jemi shumë të kënaqura. Po e
përjetojmë këtë ngjarje si hir të Zotit dhe presim që Papa ta përforcojë fenë tonë
dhe të na ndihmojë që të jemi një dritë shprese në mes të popujve që vuajnë e që kanë
probleme të ndryshme, si varfëria, vuajtja; shpresë për të rinjtë që ndihen të braktisur,
të përhumbur që nuk kanë një të ardhme të sigurtë. Po presim pikërisht atë që do të
na thotë Papa në mënyrë që edhe ne pastaj të jemi një dritë shprese për të tjerët.
Pyetje:
Një nga çastet më të rëndësishme të këtij udhëtimi, do të jetë takimi i Papës, në
Angolë me Lëvizjet Katolike që merren me promovimin e gruas. Faktori grua në Afrikë
është quajtur gjithnjë si shumë i rëndësishëm, apo jo....
Përgjigje: Gruaja
është nëna e njerëzimit dhe për ne afrikanët gruaja është pikërisht “nëna” sepse mban
në bark një qenie të gjallë. Ajo është në qendër të kulturës sonë. Mandej, e dini
edhe ju vetë, se Kisha në Afrikë mbahet nga gratë: pjesa më e madhe e të krishterëve
janë gra dhe janë fetare shumë të zellshme.