(16.03.2009 RV)Territori i sotëm Kamerunit deri në fillim të shekullit të kaluar
ishte nën protektoratin gjerman. Në vitin 1920 u nda ndërmjet Francës e Mbretërisë
së Bashkuar, një herë me mandat të Shoqërisë së Kombeve, më pas nën kujdestarinë e
administratës së OKB-së (1945). Republika e Kamerunit u themelua më 1 tetor 1961,
përmes ribashkimit të pjesës franceze (që e kishte fituar pavarësinë më 1 janar 1960),
me zonën jugore të pjesës britanike. Ndërsa zona veriore e Kamerunit britanik u
bashkua me Nigerinë. Në vitin 1972, duke modifikuar karakterin fillestar federal,
vendi u organizua në formën e një shteti të vetëm. Presidenti, që ka pushtet të gjërë
ekzekutiv, zgjidhet me votime të drejtpërdrejta. Mandati i tij zgjat 7 vjet. Asambleja
Kombëtare, me 180 anëtarë, zgjidhet çdo pesë vjet. Kameruni është anëtar i Komunuelthit,
i Organizatës së Konferencës Islamike, i OKB-së, i Bashkimit Afrikan, i WTO-së (Organizatës
Botërore të Tregtisë), i lidhur me Bashkimin Evropian. Kufizohet me Nigerinë, me
Çadin, me Republikën Qendroafrikane, me Kongon, Gabonin e Guinenë Ekuatoriale, me
Oqeanin Atlantik në gjirin e Guinesë e me liqenin e Çadit. Kufiri me Nigerinë u modifikua
në vitin 2002-2003 nga Gjykata e Lartë e Hagës, që i dorëzoi Kamerunit gadishullin
e Bakassi-t dhe rreth 1000 kilometra katrore në zonën e liqenit të Çadit. Kryeqyteti
i vendit është Yaoundé, me 1 milion e 248 e 200 banorë (2001); numër që në
vitin 2005 arriti në 1 milion e 485 mijë banorë. Gjuhë zyrtare janë frëngjishtja
e anglishtja, por përdoren edhe gjuha bantu, dialektet sudaneze e semibantu. Vendi
ka një sipërfaqe prej 475. 442 kilometra katrore e një popullsi prej
17 milion e 034 mijë banorë, 54 % e së cilës jeton në qytet. Dendësia e popullsisë
është 38 banorë për kilometër katrore. Grupet kryesore etnike banojnë në
zona të ndryshme të vendit: në jug banorët janë kryesisht bantu; në qendër-veri -
sudanezë të islamizuar; në pyjet ekuatoriale jetojnë grupe të vogla pigmejsh. Besimet:
26.7% e popullsisë është katolike, 26% ndjek besimet animiste - tradicionale, 21,8%
janë myslimanë, 17,5% protestantë. Monedha që përdoret në vend është frangu. Të
ardhurat për frymë janë 1. 002 $ US dollar në ditë.