Kardinali Staford flet mbi krizën ekonomike: bankierët të kërkojnë të falur.
(12.03.2009 RV)Në Romë, pranë Pallatit
të Kancelarisë po zhvillohet “Kursi i gjykatores së brendshme”, organizuar nga Pendestaria
Apostolike. Ditët e studimeve, që do të mbyllen të shtunën do të drejtohen nga kryetari
i këtij institucioni kardinali Xhejms Fransis Staford. Mbi temën qendrore të
kursit, që është Sakramenti i Rrëfimit, le të dëgjojmë vetë kardinalin Staford në
mikrofonin tonë:
Përgjigje: Është e rëndësishme për ne të zbulojmë përmasën
teologjike dhe baritore të mëkatit. Çfarë do të thotë të besosh në mëkatin? Mëkati
nuk është një shkelje e ligjit, por para së gjithash një fyerje kundër një personi,
një Personi hyjnor, kundër Trinisë Shenjte dhe kundër individit. Është e rëndësishme
për ne ministrat e shuguruar që ta rizbulojmë besimin kur themi se Jezu Krishti është
Shpëtimtari, Shëlbuesi i mëkateve tona.
Pyetje: Gjatë fjalës hyrëse
të këtij kursi ju folët për nevojën e formimit të meshtarëve kur ka raste shumë të
ndërlikuara dhe delikate. A mund të na përmendni disa prej tyre?
Përgjigje:
Bota jonë është e ndërlikuar. Le ta çojmë mendjen tek sfera ekonomike e cila tashti
po quhet globale: mëkatet në këtë botë ekonomike dhe globale janë, në krahasim me
të kaluarën, të ndryshme për nga natyra e ndërlikuar që kanë si edhe për nga tërësia
e tyre. Për shembull kjo krizë ekonomike e ka rrënjën tek mungesa e respektit nga
ana e udhëheqësve botërorë kundrejt njerëzve të tjerë. Bankierët duhet të marrin mbi
vete përgjegjësi morale dhe t’i kërkojnë Zotit falje për këto mëkate të kryera.