Konferencë shtypi sot në Jeruzalem mbi vizitën e ardhshme të Benediktit XVI në Tokën
e Shenjtë
(10.03.2009 RV)U zhvillua sot paradite
në qendrën Notrë Damë në Jeruzalem konferenca e shtypit në të cilën nunci apostolik
Imzot Antonio Franko, së bashku me disa përfaqësues të kishave katolike të Jeruzalemit
– ndër të cilët edhe vikari patrik maronit dhe ai melkit – lajmëruan vizitën e Benediktit
XVI në Tokën e Shenjtë. Pasi u lexua lajmi i Sallës së Shtypit të Vatikanit dhe
ai i dhënë nga vetë Papa gjatë Lutjes së Engjëllit të Tenzot të dielën që shkoi, Imzot
Franko lajmëroi datat e disa prej takimeve më kryesore dhe nënvizoi se çastet më të
rëndësishme të shtegtimit do të jenë tri Meshët e hapura për popullin: ajo në Jeruzalem,
ku priten pesë mijë vetë, në Betlehem dhe në fund në Nazaret ku edhe pritet përqëndrimi
më i madh i besimtarëve: nga dyzet deri në pesëdhjetë mijë vetë. Në vijim nunci
apostolik u shpjegoi gazetarëve se pikërisht në Nazaret do të kremtohet edhe përfundimi
i vitit që prelatët e Tokës Shenjte ia kanë kushtuar familjes. Po këtu Papa do të
bekojë edhe gurin e themelit të një qendre për familjet. Çaste të tjera kulmore të
vizitës do të jenë shtegtimi në Çenakull, ditën e parë ky, dhe te Varri i Shenjtë,
ditën e fundit. Gjithashtu nuk do të mungojnë edhe vizitat zyrtare, si përshembull
vizita presidentit të Izraelit dhe presidentit të Autoritetit Kombëtar Palestinez.
Nga ana tjetër parashikohen edhe vizita, takime ekumenike e ndërfetare, ndër të cilat
vizita Myftiut të Madh të Jeruzalemit dhe vizita në Kubenë e Shkëmbit te Fusha e Xhamive,
lutja tek Muri Perëndimor dhe ajo tek Jad Vashem, ku Ati i Shenjtë do të nderojë viktimat
e holokaustit. Vizitë tjetër është edhe ajo e Rabinëve të Mëdhej të Jeruzalemit pranë
Qendrës Heçal Shlomo. Në vazhdim nunci apostolik sqaroi edhe ndjetin e kësaj vizite
në Tokën e Shenjtë që vetë Papa e ka bërë të njohur. Ky do të jetë para së gjithash
një shtegtim për të kërkuar dhantinë e paqës dhe të bashkimit për Tokën e Shenjte,
për Lindjen e mesme dhe për të gjithë botën. Po ashtu, ky shtegtim shpreh solidaritetin
dhe afërsinë e Atit të Shenjtë Benediktit XVI me banorët e Izraelit dhe të Palestinës. Imzot
Franko tha se i ka bërë shtetit izraelit dy kërkesa që janë pritur pa pengesa: e para
që të vijë një delegacion i të krishterëve nga Gaza – dhe së paku dy autobusa me besimtarë
të marrin pjesë në Meshën që do të kremtohet në Betlehem; e dyta, të gjithë të krishterët
të mund të shkojnë pa pengesa në vendet ku do të ketë kremtime eukaristike.