Ipeshkvijtë e SHBA pas autorizimit të Obamës për kërkime shkencore mbi qelizat staminale
embrionale: fitore e politikës mbi etikën!
(10.03.2009 RV)“Një veprim moralisht
i gabuar, që inkurajon trajtimin e qenies njerëzore si të ishte mall tregu”: ky është
komenti i hidhur i episkopatit amerikan për nënshkrimin e një urdhëri ekzekutiv nga
ana e Barak Obamës, që autorizon financimin publik të kërkimeve shkencore mbi qelizat
staminale embrionale. Për lëvizjet amerikane pro-life, ky qëndrim i presidentit të
SHBA-ve është një vendim pastërtisht idelogjik. “Fitore e trishtuar e politikës
mbi shkencën e mbi etikën”: kështu e komentoi kardinali Justin Rigali vendimin e marrë
nga presidenti Barak Obama për të autorizuar kërkimin shkencor mbi qelizat staminale
embrionale. Në një notë, kryetari i Komisionit të episkopatit amerikan për mbrojtjen
e jetës, nënvizon se “direktivat e reja të administratës së Uashingtonit janë moralisht
të gabuara, sepse inkurajojnë shkatërrimin e jetëve të pafajshme”. Nga ana tjetër
– thekson kardinali – duke autorizuar për herë të parë përdorimin për këtë qëllim
të fondeve publike, “nënvleftësohen vlerat e atyre miliona kontribuesëve amerikanë,
që i kundërvihen kërkimeve mbi embrionet”. Mbi vendimin e Obamës për t’i hapur rrugën
financimeve federale për kërkime mbi staminalet embrionale, të ndjekim komentin e
profesor Françesko D’Agostinos, kryetar i Komitetit italian të bioetikës:
Përgjigje:
- Në rastin e Obamës, edhe një herë çështja është propagandistike, me që
një pjesë e madhe e kërkimit shkencor në SHBA bazohet mbi fondet publike e vetëm një
pjesë fare e vogël, mbi fondet shtetërore.
Pyetje: - “Presidenti
amerikan e konsideron këtë si ‘mbrojtje e lirisë për kërkime shkencore’…
Përgjigje:
- Duke qenë i lirë, shkencëtari nuk mund e nuk duhet të ushtrojë dhunë
mbi qeniet e tjera njerëzore. Bioetika lindi pikërisht për këtë: nuk do të kishte
fare nevojë për bioetikë, në se parimi sipas të cilit shkencëtari mund të bëjë kërkime
si të dojë, kur të dojë e me kë të dojë, do të pranohej si parim paqësor e jo problematik.
Pyetje:
- Gjithnjë presidenti Obama nënvizoi: duhet të punojmë për të lehtësuar vuajtjen
njerëzore…
Përgjigje: - Ta kufizosh vuajtjen njerëzore është
detyra e parë e mjekësisë, me kusht që të mos rëndohet vuajtja e disave, për të lehtësuar
vuajtjen e të tjerëve. Të gjitha eksperimentet, që ne zakonisht i quajmë të ‘mjekësisë
çnjerëzore’, patën si qëllim përparimin e njohurive shkencore, por për fat të keq
qenë eksperimente të kryera përmes shkatërrimit ose dhunës së palejueshmne mbi jetë
të tjera njerëzore. Në një letër drejtuar Obamës më 16 janarin e kaluar, kryetari
i ipeshkvijve amerikanë, kardinali Frensis Xhorxh, e pati nxitur presidentin të garantonte
mbrojtjen e jetës. E pati nënvizuar se, ndërsa kërkimi shkencor mbi qelizat staminale
të të rriturve, që Kisha e inkurajon, ka pasur gjithnjë rezultate të dukshme, siç
pohohet edhe nga revista” Shkenca”, rezultatet e arritura në kërkimin mbi qelizat
embrionale, janë krejt të papërfillshme.
Vendimi i Obamës nxjerr në plan
të parë diskutimin mbi dinjitetin e njeriut, të cilit i kushtohet Udhëzimi “Dignitas
personæ”, publikuar në dhjetorin e kaluar. Kisha, lexohet në dokumentin e Vatikanit,
një shekull më parë mbrojti me guxim punëtorët, të cilëve u shkeleshin të drejtat
e tyre; sot mbron një kategori tjetër, atë të njeriut që sapo është zënë, të cilit
i mohohet e drejta themelore për të jetuar. Kërkimi shkencor mbi qelizat staminale
embrionale, vëren Udhëzimi, është për t’u dënuar sepse i mungon jo vetëm drita e Zotit,
por edhe humaniteti.