Papa në manastirin e Shën Françeskës Romake të Tor de’ Speki.
(09.03.2009 RV)Pas vizitës në Kampidol, Papa shkoi në manastirin e afërm të
Shën Françeskës Romake në Tor de’ Speki. Në Kapelën e Korit u mbajt një çast i shkurtër
kremtimi, gjatë të cilit u adhurua i Shenjtnueshmi Sakrament dhe u nderua trupi i
Shën Françeskës Romake, në festën e saj të sotme liturgjike. Benedikti XVI u drejtoi
fjalën rregulltareve, pasi ndoqi përshëndetjen e Nënës Maria Kamila Rea, eprore e
manastirit. Kështu Benedikti XVI nderoi ‘më romaken ndërmjet shenjtorëve’, ndërsa
vijon ende përkujtimi i katërqindvjetorit të shenjtërimit të saj. Foli për përkushtimin
e plotë ndaj Zotit e të afërmit të Shën Françeskës, bashkëshorte, nënë e tre fëmijëve
e më pas themeluese e Oblateve të Tor de’ Speki, që ndërmjte viteve 1300 e 1400 bëri
të lindë një përvojë e re, sipas së cilës heshtja e lutja lidhen ngushtë me veprimtarinë
e përditshme. Kundrimi e veprimi, lutja e shërbimi i bamirësisë, ideali monastik
e impenjimi shoqëror: gjithë kjo gjeti këtu një laborator të pasur me fryte, në lidhje
të ngushtë me murgjërit Olivetanëë të Shën Marisë së Re. Por nuk duhet harruar se
i vetmi motor, që e vuri në lëvizje gjithçka u realizua në rrjedhë kohe, ishte zemra
e Françeskës, në të cilën Shpirti Shenjt derdhi pa kursim dhantitë e veta shpirtërore
e, njëkohësisht, nxiti nisma të panumërta, në shërbim të së mirës së njeriut. Manastiri
i Shën Françeskës Romake – theksoi Papa – karakterizohet nga një drejtpeshim i veçantë
ndërmjet jetës rregulltare e jetës laikale, ndërmjet jetës në botë e asaj jashtë botës
e, duke u ndodhur në zemër të qytetit, bëhet gati-gati simbol i nevojës për ta çuar
në qendër të bashkëjetësës civile, përmasën shpirtërore, për t’i dhënë, kështu, kuptim
të plotë, veprimtarive të panumërta të qenies njerëzore.