Engjëlli Tënzot: Papa kujton Ditën e gruas, paraqet Nënë Terezën si shembull për
të gjitha gratë dhe njofton udhëtimin në Tokën e Shenjtë dhe në Kamerun e Angola
(09.3.2009 RV)Dje gjatë Lutjes së
Engjëllit të Tënzot Benedikti XVI kujtoi Ditën e 8 marsit kushtuar grave e paraqiti
Nënë Terezën si shembull për të gjitha gratë që “në fshehtësi” punojnë për të mirën
e njerëzimit. Ati i Shenjtë Racinger u kërkoi besimtarëve t’i lutën Zotit për udhëtimet
e tij të afërta në Afrikë, nga data 17 deri më 23 mars, e në Tokën e Shenjtë, ku do
të shkojë nga data 8 deri më 15 maj. Kështu pra, Papa Benedikti XVI njoftoi se
në maj do të shtegtojë në tokën e Jezusit: “Nga 8 deri më 15 maj do të kryejë
një shtegtim në Tokën e Shenjtë për t’i kërkuar Zotit, duke i vizituar vendet e shenjtëruara
nga kalimi i tij tokësor, dhuratën e çmuar të bashkimit e të paqes në Lindjen e Mesme
dhe për mbarë njerëzimin. Që tani llogaris në mbështetjen shpirtërore të të gjithë
juve, në mënyrë që Zoti të më përcjellë e t’i mbush me hiret e tij hyjnore të gjithë
ata që do t’i takojë gjatë udhës time”. Duke pranuar ftesën e mbretit të Jordanisë,
të presidentit të Izraelit, të presidentit të Autoritetit Palestinez e të Asamblesë
së ipeshkvijve katolikë – lexohet në komunikatën e Sallës së Shtypit të Selisë së
Shenjtë – Benedikti XVI “do të shkojë në Aman, Jerusalem, Betlehem e Nazaret”. Pak
para lajmërimit të shtegtimit në Tokën e Shenjtë, Papa kujtoi një udhëtim tjerë apostolikë
që do ta bëj së shpejti: “Javën e ardhshme, nga data 17 deri më 23 mars, do
të shkojë në Afrikë, së pari në Kamerun e këndej në Angola, për të dëshmuar afërsinë
konkrete timen e të Kishës, të krishterëve e popullsive të atij kontinenti të cilin
e kam posaçërisht për zemër”. Gjithnjë gjatë lutjes së Engjëllit të Tënzot
dje në Sheshin e Shën Pjetrit në Vatikan, Papa u ndal tek pjesa e Ungjillit të liturgjisë
së dielës së dytë të Kreshmëve që flet mbi Shndërrimin e Jezusin. Duke komentuar këtë
pjesë ungjillore, Papa tha se “kur Jezusi merr me vete mbi një mal të lartë Pjetrin,
Jakobin e Gjonin “shndërrohet”: fytyra e tij e personi i tij u bënë ndriçuese të bardha,
sa që asnjë zbardhues mbi tokë nuk mund t’i zbardhojë ashtu. Shndërrimi i Jezusit
– shpjegoi Papa –ka qenë thellësisht një eksperiencë lutjeje: “Në të vërtetë,
lutja e arrijnë kulmin e vet, e prandaj bëhet burim i dritës së brendshme, kur shpirti
i njeriun aderon me atë të Hyjit e vullnetet e tyre shkrihen aq sa bëhen një i vetëm.
Kur Jezusi ngritët mbi mal, zhytet në kundrimin e planit të dashurisë së Atit, i cili
e pati dërguar në botë për ta shpëtuar njerëzimin”. E në vazhdim Ati i Shenjtë
Racinger i ftoi besimtarët dhe shtegtarët e pranishëm në lutjen e mesditës në Vatikan,
t’i lutën Zotit, t’i kushtojnë kohë dëgjimit të Fjalës Hyjnore e meditimit të mistereve
të Krishtit: “Së bashku me agjërimin dhe veprat e mëshirshme, lutja formon strukturën
bartëse të jetës sonë shpirtërore. Të dashur vëllezër e motra, gjatë kësaj kohe të
Kreshmëve, ju ftoj të gjeni çaste të volitshme për heshtje e ushtrime shpirtërore,
për ta rishikuar jetën personale në dritën e planit të dashurisë së Atit qiellor.
Lejoni që Virgjëra Mari, mësuese e shembull i lutjes, të ju udhëheq në dëgjimin intensiv
të Zotit”. E mendimi i Papës shkoi në Ditën e djeshme të gruas: “Data
e sotme – 8 mars – na fton të reflektojmë mbi kushtet e grave e të ripërtërijmë angazhimin
tonë, në mënyrë që gjithmonë e kudo, çdo grua të mund të jetojë e t’i shfaq plotësisht
aftësinë e veta duke arritur respektin e plotë për dinjitetin e saj”. Në këtë
drejtim – kujtoi Papa Benedikti XVI – janë shprehur Koncili i Dytë i Vatikanit dhe
magjisteri papnor, në mënyrë të veçantë Letra apostolike e shërbëtorit të Zotit Gjon
Palit II ‘Mulieris dignitatem’. “...E epoka jonë ka pasur Nënë Terezën e Kalkutës:
bijën e përvujtë të Shqipërisë, e cila në saje të hirit të Zotit, u bë shembull për
tërë botën në ushtrimin e dashurisë e në shërbimin e promovimit njerëzor. Sa e sa
gra tjera punojnë çdo ditë, në fshehtësi, për të mirën e njerëzimit e për Mbretërinë
e Zotit! Sot, siguroi lutjen time Zotit për të gjitha gratë, që të jenë gjithnjë e
më të respektuara në dinjitetin e tyre e të vlerësuara në aftësitë e tyre pozitive”.