Efikasiteti i drejtësisë ndërkombëtare: intervistë me ekspertin e Universitetit të
Padovës.
(07.03.2009 RV)Mjetet për mbrojtjen
e të drejtave të njeriut në botë janë zgjeruar mjaft gjatë viteve të fundit, pas ngjarjeve
dramatike në ish-Jugosllavi, në Ruandë e në Lindjen e Mesme. Akti i fundit është ngritja
e gjykatës së veçantë për Libanin. Pavarësisht nga kjo, e drejta penale ndërkombëtare
ndeshet shpesh me pengesa, të cilat varen nga interesat politike e strategjitë diplomatike
të shteteve të ndryshme, si në rastin e disa eksponentëve të qeverisë sudaneze, përgjegjës
për krimet në Darfur, që nuk mundën të procesoheshin nga Prokuroria e Gjykatës Ndërkombëtare
të Hagës. Pikërisht për të kuptuar se deri ku mund të shtyhet drejtësia ndërkombëtare,
pyetëm titullarin e katedrës së UNESCO-s për të drejtat e njeriut, demokracinë dhe
paqen në Universitetin e Padovës në Itali, prof. Antonio Papiska: Të kemi parasysh
atë që ekziston e funksionon aktualisht: kemi një Gjykatë Penale Ndërkombëtare të
përhershme, që ka juridiksion me karakter universal; pastaj, kemi gjykata të veçanta
me formula organizative të ndryshme, sipas situatës. Pra, gjykatat si ajo për ish-Jugosllavinë,
për Ruandën e tani, edhe për Libanin, janë organizma që veprojnë duke marrë parasysh
si rastin e veçantë në proces, ashtu edhe interesat politike. Pra, Gjykata
Penale Ndërkombëtare dhe gjykatat e veçanta dallohen nga njëra-tjetra dhe ndjekin
një ideal të ndryshëm të së drejtës ndërkombëtare? Gjykata Penale Ndërkombëtare
funksionon në bazë të një traktati ndërkombëtar. Në gjykatat e tjera, kemi një formë
tjetër juridike, që i bën ato të ligjshme. Gjithsesi, në të gjitha rastet, mbizotëron
autoriteti me karakater politik e madje edhe politiko-moral i Kombeve të Bashkuara. Me
një fjalë, shtetet që nuk e njohin autoritetin e Gjykatës Penale Ndërkombëtare, nuk
janë subjekt i juridiksionit të saj? Po, ky është një kufizim i madh i funskionimit
aktual të Gjykatës Penale Ndërkombëtare. Të gjithë e dinë se atë nuk e pranojnë SHBA-të,
pasi nuk kanë ratifikuar Konventën e Romës, e në rrugën e SHBA-ve, edhe shtete të
tjera më pak të fuqishme, që nuk i binden autoritetit të magjistraturës ndërkombëtare. Deklarata
“nuk e njoh autoritetin e kësaj gjykate” është bërë strategji tashmë… Karaxhiqi
ka bërë një deklaratë të tillë, pikërisht pak ditë më parë, në gjurmët e deklaratës
së Millosheviçit, i cili mohonte juridiksionin e Gjykatës Penale Ndërkombëtare për
krimet në ish-Jugosllavi. Këta janë individë të veçantë, por duhet të kujtojmë se
një nga parimet e së drejtës penale ndërkombëtare është ai i përgjegjësisë penale
personale, e cila mund të ndiqet edhe në seli ndërkombëtare. Gjithsesi, të shohim
aspektet pozitive. Po krijohet një sistem drejtësie ndërkombëtare, gjithnjë e më tepër
i përshkuar nga ideale, parime, që janë brenda legjislacionit për të drejtat e njeriut.
Ky është një aspekt shumë pozitiv për t’i siguruar të njëjtin dinjitet të gjithë anëtarëve
të familjes njerëzore.