Kryesia e Bashkësisë Islame e Kosovës:Nënë Terza duhet të çmohet nga të gjithë e distancohet
nga myftiu Krasniqi
(25.2.2009 RV)Angazhimi dhe sakrifica e Nënë Terezës duhet të çmohet nga të
gjithë . Kryesia e Bashkësisë Islame e Kosovës, në një mbledhje të kryesuar nga myftiu
Naim Tërnava, ka shqyrtuar edhe kualifikimet e dr. Shefqet Krasniqit për humanisten
tonë, Nënën Terezë. Me këtë rast, Kryesia e BI (Bashkësisë Isalme) distancohet publikisht
nga kualifikimet e imam Krasniqit, për çka edhe është thirrur në përgjegjësi. Kryesia
e BI-së kupton interpretimin doktrinar të teologëve të feve të ndryshme, mirëpo ajo
kërkon që të ruajnë etikën dhe t'u përmbahen parimeve hyjnore në ligjërimet e tyre
duke u angazhuar për paqe, tolerance e dashuri e jo për urrejtje e ofendime, si dhe
të respektohen njerëzit dhe objektet e kultit, pavarësisht përkatësisë së tyre fetare,
thuhet në një komunikatë të BIK. "Ne si popull jemi të njohur për kultivimin e tolerancës
e mirëkuptim ndërfetarë, vlerë kjo që është leva më pozitive e populli tonë. Kualifikimet
e imamit Krasniqi, ne i konsiderojmë si rast të izoluar dhe kërkojmë nga të gjithë
që të mos i fryjnë këtij rasti që nuk i bën nder askujt. Për më tepër, parimet islame
çmojnë lartë punën, angazhimin, sakrificën, solidaritetin, humanitetin dhe kontributin
e të gjithë atyre që përpiqen për të mirën e përgjithshme të njerëzimit, pa dallim
feje, kombësie, race e gjuhe. Mësimet islame madje, në veçanti urdhërojnë për respektimin
e prijësve dhe shërbyesve fetarë, të cilës feje qofshin ata. Kryesia e BI së çmon
lartë kontributin e humanistes shqiptare Nëna Terezë, aq më tepër, kur ajo ka një
reputacion ndërkombëtar të cilin e ka arritur në saje të humanitetit dhe vlerave fetare
të nxjerr nga librat e shenjtë", theksohet në komunikatë. "Angazhimi dhe sakrifica
e Gonxhe Bojaxhiut duhet të çmohet nga të gjithë dhe jo të fyhet nderi e dinjiteti
i saj. Nëse me Gonxhe Bojaxhiun na dallon feja, është përkatësia jonë e përbashkët
kombëtare ajo që na bashkon dhe na bën që ne të respektojmë dhe ta mbrojmë personalitetin
dhe veprën e saj", theksohet në fund të komunikatës të Kryesisë së Bashkësisë Islame
të Kosovës. Kryesia e BI të Kosovës dënon edhe sulmin ndaj imamit Ejup Kransiqi, duke
e cilësuar si një akt kriminal i kryer nga njerëz të lig të cilët imamit i kanë kurdisur
kurth me gjoja ftesën për të marrë pjesë në një ceremoni fetare. I vetmi institucion
legal e legjitim që merret me organizimin, zhvillimin dhe mbikëqyrjen e jetës fetare
islame në Kosovë është Bashkësia Islame e Kosovës dhe institucionet e saja kompetente.
Tentimi për t'u përzier në punët dhe kompetencat e BI së është i papranueshëm, madje
po aq i papranueshëm është edhe dhënia e fetfave nga njerëz të ndryshëm që nuk kanë
as dijen e duhur e as legjitimitete e këtij populli. Kryesia e Bashkësisë Islame të
Kosovës dënon edhe njëherë fuqishëm rastin e sulmit nga Ejup Kransiqit dhe kërkon
nga organet e ndjekjes që sa më parë të gjejë autorët e kësaj vepre kriminele e t’i
nxjerre para drejtësisë. Dhuna, shantazhi dhe atakimi i bartësve të funksioneve të
BI së është atak edhe mbi shoqërinë kosovare dhe sulm i drejtpërdrejtë në institucionet
e BI së. Andaj edhe njëherë kërkojmë që autorët e këtyre veprave të shëmtuar të zbulohen
sa më parë, thuhet në një deklaratë të Bashkësisë Islame të Kosovës.