Fjalët e Papës gjatë lutjes së Engjëllit të Tënzot
(23.2.2009 RV)Jezusi që përkulet
mbi ligështinë njerëzore dhe festa e Katedrës së Shën Pjetrit ishin dje në qendër
të reflektimit të Papës gjatë lutjes së Engjëllit të Tënzot në Sheshin e Shën Pjetrit
në Vatikan. Jezusi ka pushtet jo vetëm për të shëruar trupin e sëmurë, por edhe
për të falur mëkatet: kështu tha Benedikti XVI duke komentuar pjesën e Ungjillit që
propozoi dje liturgjia, atë mbi shembëlltyrën e të paralizuarit të falur e të shëruar
nga Krishti. Më tutje, dje në festën e Katedrës së Shën Pjetrit, Papa ripohoi vlerën
e Primatit të Pjetrit në Kishë, duke kërkuar lutjen e besimtarëve për këtë “detyrë
të lartë” që ka pasardhësi i shën Pjetrit apostull. Festa e Katedrës së Shën Pjetrit
“simbolizon autoritetin e ipeshkvit të Romës, i thirrur për një shërbim të veçantë
ndaj tërë Popullit të Zotit”. Menjëherë pas martirizimit të Shën Pjetrit e Palit,
kujtoi Papa, Kishës së Romës iu njoh roli i parisë në mbarë bashkësinë katolike, rol
që vërtetohet e pohohet qysh në shekullin II nga Shën Injaci i Antiokisë e nga Shën
Ireneu i Lionit. “Ky shërbim i veçantë e i posaçëm i Ipeshkvit të Romës është
ripohuar nga Koncili II i Vatikanit. “Në bashkimin kishtar, -lexojmë në Kushtetutën
dogmatike mbi Kishën – me të drejtë, pra ligjërisht ekzistojnë edhe Kisha të veçanta,
të cilat kanë tradita të veta, ndërsa primati i Katedrës së Pjetrit mbetet i paprekur,
kryeson tërë Kishën në bashkimin universal të dashurisë (krh Shën Inj. Ant., Ad Rom.,
Pref.), mbron pluralizmin e ligjshëm kishtar, e njëkohësisht mbikqyr tiparet e veçanta
të Kishave lokale, që të mos jenë në dëm të bashkimit, por përkundrazi, madje t’i
shërbejnë këtij qëllimi” (Lumen gentium,13).” E pastaj Benedikti XVI kërkoi
mbështetjen e besimtarëve, përmes uratës: “Kjo festë e Katedrës së Shën Pjetrit,
më jep rastin për t’ju kërkuar të më shoqëroni me lutje, në mënyrë që të mund ta
kryej besnikërisht detyrën e lartë që Provania Hyjnore më ka besuar, si Pasardhës
i shën Pjetrit apostull”. Në vazhdim të lutjes së Engjëllit të Tënzot, Ati
i Shenjtë Racinger kërkoi ndërmjetësimin e Virgjërës Mari e përmendi kohën e Kreshmëve,
e cila fillon pasnesër. “T’i lutemi për këtë Virgjërës Mari, të cilën dje këtu,
në Romë, e kremtuam me titullin e bukur Zoja e Besimit. Asaj t’i kërkojmë të na ndihmojë
të hyjmë me gatishmërinë e përgatitjen e duhur të shpirtit në kohën e Kreshmëve, të
cilat fillojnë të mërkurën e ardhshme me Ritin sugjestionues të Përhimjes. Maria
na haptë zemrën për kthimin tek Zoti dhe për dëgjimin e vëmendshëm të Fjalës së Hyjit”. Pas
lutjes së Engjëllit të Tënzot, Papa përshëndeti shtegtarët e pranishëm në Sheshin
e Shën Pjetrit në Vatikan në gjuhë të ndryshme. Në gjuhën franceze, inkurajimi i Benediktit
XVI për të menduar në Jezusin, që “na dhuron një zemër të aftë për të dashur e për
të falur dhe na liron prej paralizimeve e dyshimeve tona”; në gjuhën gjermane, reflektimi
mbi Katedrën e Shën Pjetrit; në gjuhën spanjolle reflektimi mbi Kreshmët; në gjuhën
polake një thirrje për ta shikuar kohën e pendesës kreshmore me shpresë; në gjuhën
angleze, inkurajimi që të mos hezitojmë t’i kërkojmë falje Zotit, në mënyrë të posaçme
përmes sakramentit të Pajtimit, për ta përjetuar kështu mëshirën që Zoti ka ndaj zemrave
të penduara.