У свеце налічваецца 1,2 мільярды людзей, якія галадаюць, штодзённа ад голаду паміраюць
10 тысяч дзяцей і 25 тысяч дарослых. Такія дадзеныя абнародавала ў сваім дакладзе
Арганізацыя па сельскай гаспадарцы і харчаванні ААН. У апублікаваным дакуменце падкрэсліваецца,
што праблема голаду на зямлі з цягам часу не толькі не памяншаецца, але наадварот
— паглыбляецца і ўжо закранае краіны, якія раней з ёй не сутыкаліся.
Дабрачынная
арганізацыя «Карытас», якая дапамагае патрабуючым у шматлікіх краінах свету, нагадвае,
што па-ранейшаму замоўчваецца той факт, што сучасны голад — гэта вынік дыскрымінацыі
і адпіхвання на перыферыю грамадства мільёнаў людзей.
Міжнародная медыцынская
гуманітарная арганізацыя «Урачы без межаў» і Сусветная праграма па харчаванні «Марш
супраць голаду» ў адозве, апублікаванай у ватыканскай газеце «L'Osservatore Romano»,
заклікаюць да дзеяння і вырашэння дадзенай праблемы, бо 55-ці мільёнам дзяцей, якія
не маюць адпаведнага харчавання, па-ранейшаму будзе пагражаць смерць.
З
нагоды Сусветнага дня барацьбы з голадам (адзначаецца 16 кастрычніка) палітыкі, вучоныя,
журналісты і працаўнікі іншых установаў прапанавалі розныя спосабы вырашэння гэтай
праблемы: — Каб пакрыць незадаволеныя патрэбы свету ў сферы гігіены
і харчавання, дастаткова 13 мільярдаў долараў — менавіта такую суму людзі ў ЗША і
Еўрасаюзе штогод выдаткоўваюць на духі.
— За кошт
аднаго ракетнага снарада можна было б на працягу 5 гадоў забяспечваць штодзённым абедам
поўную школу галодных дзяцей.
— У 90-х гг. мінулага
стагоддзя больш за 100 мільёнаў дзяцей памерла ад хвароб і голаду. Гэтага можна было
не дапусціць за кошт двухдзённых выдаткаў на вайсковыя мэты ва ўсім свеце.