На Беларусі езуіцкія калегіюмы былі не горшыя за сёньняшнія ўнівэрсытэты
Часта, пералічаючы беларускія помнікі архітэктуры, мы называем устойлівае словазлучэньне
“езуіцкі калегіюм”, і не заўжды задумваемся, што гэта была за ўстанова, і ўвогуле
– хто такія езуіты. Слынны пісьменьнік-гісторык Уладзімер Арлоў дапамагае нам сёньня
адказаць на гэтае пытаньне. Напачатку – хто такія езуіты? У. Арлоў: У Расейскай
імпэрыі, а затым у Савецкім Саюзе ня надта шанавалі ўсе каталіцкія ордэны. Але найболей
даставалася сябрам Таварыства Ісуса, як афіцыйна называецца ордэн езуітаў. Нам у галовы
доўга ўбівалі такое меркаваньне пра айцоў-езуітаў, як пра цемрашалаў, людзей небясьпечных
і наогул з усіх бакоў “нянашых”. Насамрэч, не адпускаючы езуітам нейкіх іхных сапраўдных
грахоў, я хачу сказаць, што Таварыства Ісуса ў сваёй гісторыі зрабіла вельмі шмат
і карыснага. Езуіты займаліся дабрачыннасьцю, змагаліся з эпідэміямі, адчынялі аптэкі
й шпіталі, друкавалі кнігі… А найбольшая іх заслуга ў тым, што яны стварылі перадавую
для свайго часу сыстэму асьветы. Філёзаф Фрэнсіс Бэкан калісьці пісаў: “Бярыце прыклад
зь езуіцкіх школ, бо лепшых не існуе на сьвеце…” Езуіты далі адукацыю Мальеру й Вальтэру,
Дэкарту й Мантэск’ё, Казіміру Лышчынскаму й Сімяону Полацкаму – калі казаць пра нашыя
землі. Калі ж сябры Таварыства Ісуса прыйшлі на Беларусь? У. Арлоў:
Езуіты зьявіліся ў Беларусі пераважна ў другой палове XVI стагодзьдзя. Ужо ў ліпени
1580 году ўзяла свой пачатак гісторыя Полацкага езуіцкага калегіюма, на закладзінах
якога, дарэчы, прысутнічаў вялікі князь і кароль Сьцяпан Батура, а першым рэктарам
быў славуты каталіцкі прапаведнік, філёзаф, тэоляг Пётар Скарга. А ўвогуле на этнічных
беларускіх землях, апрача Полацкага, налічвалася яшчэ 15 езуіцкіх калегіюмаў, у тым
ліку ў Вільні, у Берасьці, у Горадні, у Віцебску, у Магілёве, у Жодзішках, у Юравічах,
у Смаленску… І ўсё-ткі – што ж такое езуіцкі калегіюм паводле сучаснай градацыі
адукацыйнага працэсу: школа, гімназія ці ўвогуле калегіюм можна параўнаць з унівэрсытэтам? У.
Арлоў: Калі калегіюм быў поўны, то яго навучальная праграма мала чым адрозьнівалася
ад унівэрсытэцкай. Адзінае што, Статут калегіюму не дазваляў прысуджаць навуковыя
ступені. І каб абараняць, кажучы сучаснай мовай, дысэртацыі, трэба было кіравацца
ў бліжэйшую Вільню ці яшчэ якую alma mater. Калі тагачасны езуіцкі калегіюм
можна прыраўняць да сучаснага ўнівэрсытэту, дык цікава: якія ж дысцыпліны там выкладаліся? У.
Арлоў: Узыходжаньне да вяршыняў ведаў пачыналася зь пяцікляснай гімназіі. Там
выкладаліся дысцыпліны з цыклю вольных мастацтваў: граматыка, рыторыка, паэтыка… За
шэсьць гімназічных гадоў (у апошняй, пятай клясе вучыліся два гады) трэба было засвоіць
гэтыя навукі й дасканала авалодаць лацінскаю ды старажытнагрэцкаю мовамі. Факты пярэчаць
пашыранай думцы пра тое, што ў езуіцкіх калегіюмах была забароненая беларуская мова.
Якраз не. Пакуль хлопчыкі не зусім вольна пачуваліся ў лаціне, прынамсі да сярэдзіны
XVII стагодзьдзя навучаньне ў малодшых клясах ішло менавіта па-беларуску. Дарэчы,
з 1584 году, як сьведчаць дакумэнты, старабеларуская мова выкладалася ў Полацкім калегіюме
як самастойная дысцыпліна. Пасьля гімназіі можна было вучыцца далей на трохгадовым
курсе філязофіі, альбо на чаторохгадовым курсе тэалёгіі. Праўда, на гэтым курсе маглі
навучацца толькі сябры й кандыдаты ордэна езуітаў. Падмуркам філязофскага курсу, да
прыкладу, былі трактаты Арыстотэля, тэалягічнага курсу – погляды Тамаша Аквінскага.
Калі выпускнік калегіюму сканчаў аддзяленьне філязофіі, ён мог стаць выкладчыкам з
навуковай ступеньню магістра. А пасьля тэалёгіі нават атрымаць пасаду прафэсара… Апрача
ўжо названых дысцыплінаў, у Полацкім калегіюме, як і ў іншых, вывучаліся арытмэтыка
й геамэтрыя, фізыка й астраномія, гісторыя й геаграфія, музыка й лёгіка… Давайце
працягнем паралелі зь сёньняшнімі ўнівэрсытэтамі: ці давалі навучэнцам калегіюмаў
інтэрнаты, ці добра кармілі іх, ці праводзіліся спартакіяды й дні здароўя? У.
Арлоў: Можна правесьці вельмі цікавыя паралелі, і я рызыкну сказаць, што не заўсёды
яны будуць на карысьць сучасных навучальных установаў!.. Навучэнцы калегіюмаў атрымлівалі
месцы ў інтэрнатах, якія тады называліся бурсамі. Іх кармілі, клапаціліся пра іх фізычнае
выхаваньне, былі нават адмысловыя дні, прысьвечаныя фізычнай падрыхтоўцы, дзе выкладалася
нават фэхтаваньне. Вельмі эфэктыўна выкладаліся замежныя мовы. Выкарыстоўваўся вядомы
й цяперашнім пэдагогам мэтад заглыбленьня ў моўную стыхію, калі на пэўным этапе выкладаньня
вучням забаранялі карыстацца якой-небудзь іншай мовай – на занятках, у час падрыхтоўкі
да заняткаў… У гісторыі Полацка ёсьць адна слаўная старонка, зьвязаная зь езуітамі.
Некалькі дзесяцігодзьдзяў гэты беларускі горад быў сусьветнай сталіцай Таварыства
Ісуса. Калі ў 1773 годзе езуіты пасварыліся з Папам Рымскім, і той выгнаў іх зь Вечнага
гораду, сваёй сталіцай яны абралі менавіта Полацак. На некалькі дзесяцігодзьдзяў наш
горад стаў адной зь інтэлектуальных сталіц Эўропы, сюды зьехаліся працаваць прафэсары
з Сарбоны, гішпанскіх, італійскіх унівэрсытэтаў. У 1814 годзе ўжо іншы Папа дазволіў
езуітам вярнуцца ў Рым. І зараз у рэзыдэнцыях езуітаў на берагах Тыбру можна пабачыць
гравюры з выявамі нашага Полацку. Дарэчы, што асабліва прыемна, Полацкі калегіюм,
прынамсі ягоны будынак, і сёньня служыць асьвеце. У. Арлоў: Полацкі калегіюм
у 1812 годзе быў ператвораны ў Полацкую акадэмію, набыў унівэрсытэцкі статус. Таму
мы можам казаць, што да нашых дзён захаваліся будынкі і калегіюма, і акадэміі. Вельмі
прыемна адзначыць, што ўжо некалькі гадоў у карпусы былой Полацкай акадэміі (якая
таксама, нягледзячы на сваю непрацяглую васьмігадовую гісторыю адыграла значную ролю
ў нашай культуры, у гісторыі нашай асьветы) цяпер пакрысе пераязджаюць факультэты
Полацкага дзяржаўнага ўнівэрсытэту. Ужо некалькі гадоў у старых езуіцкіх карпусах,
у гэтых аўдыторыях з унікальнай акустыкай, з такой вельмі цікавай аўрай, займаюцца
гісторыкі й філёлягі. Цяпер туды пераязджаюць юрысты… І я мару пра той час, калі ў
дворыку Полацкага ўнівэрсытэту, які ўжо магчыма цалкам пераедзе ў старыя карпусы,
у працяг асьветніцкіх традыцыяў езуітаў, зьявяцца помнікі славутым выпускнікам і выкладчыкам
полацкай alma mater: аднаму з заснавальнікаў новай беларускай літаратуры Яну Баршчэўскаму,
выдатнаму мастаку Валенцію Ваньковічу альбо выкладчыку Полацкага калегіюму Мацею Казіміру
Сарбеўскаму, сусьветнавядомаму паэту-лаціністу, чые вершы ілюстраваў Пітэр Паўль Рубэнс… Гэта быў пісьменьнік Уладзімер Арлоў, які распавядаў нам пра езуітаў на Беларусі
й ролю езуіцкіх калегіюмаў у нашай гісторыі, культуры ды адукацыі.Арцём Багданаў,
Менск