Shkenca e feja: në Romë kremtohet një meshë për Galileo Galilein.
(16.02.2009 RV)“Galileo jo më kot është quajtur “njeri i Zotit”, pasi ai diti
ta shohë e ta studiojë shkencën përmes syve të fesë”: kështu shkruan Sekretari i Shtetit
të Vatikanit, kardinali Tarçizio Bertone në telegramin, që u drejtoi pjesëmarrësve
të meshës në nder të Galileo Galileit. Mesha u kremtua dje paradite në Bazilikën e
Shën Marisë së Engjëjve në Romë, me rastin e 445-vjetorit të lindjes së astronomit
të madh pizan. “Galileo – shpjegoi kryetari i Këshillit Papnor për Kulturën, imzot
Xhanfranko Ravazi, që kryesoi meshën – diti të dallojë dy arësyet, atë të shkencës
e atë të të vërtetave të dobishme për shpëtimin tonë”. Mesha e djeshme, e kërkuar
nga Federata Botërore e Shkencëtarëve, është një hap i rëndësishëm në dialogun e shkencës
me fenë. Të dëgjojmë jezuitin, atë Enio Brovedani, drejtor i Institutit Stensen dhe
ideator i konferencës ndërkombëtare kushtuar “Çështjes së Galileut”, në program në
Firence të Italisë, nga 26 deri më 30 maj: Jam optimist pasi në këtë nismë
marrin pjesë 18 institute ndërkombëtare, institutet më të rëndësishme kishtare, universitare
dhe kulturore e sidomos ato institute që, në histori, kanë pasur një rol në çështjet
galileane. E është interesant të shohësh se si të gjithë e kanë kuptuar rëndësinë
e problemit, të temës. Ky është një sinjal pozitiv, natyrisht. Të gjitha institucionet
janë të bindura se ekzistojnë kushtet për të krijuar një klimë sinergjie ndërmjet
mesazhit të promovimit njerëzor të Kishës dhe kërkesave të sotme të punës kërkimore
tekno-shkencore.
Cilat janë përpjekjet që duhet të bëjnë Kisha nga njëra
anë, sidomos teologët, dhe bota shkencore nga ana tjetër, për një bashkëpunim më të
frytshëm? Përpjekjet duhen bërë nga të dyja palët, të cilat duhet të shohin
përpara, drejt së ardhmes, pa ua vënë veshin mosmarrëveshjeve të së kaluarës. Mendoj
se reflektimi mbi Galileo Galilein i ka bërë të vetëdijshme si shkencën, ashtu edhe
filozofinë e Kishën për kufizimet reciproke, për nivelet e ndryshme të njohjes e të
dijes. Kjo ka kontribuar të kuptohet sa i ndërlikuar është realiteti, cilat janë problematikat
etike, që ngre aktiviteti kërkimor-shkencor, para se të bëhet dije. Dimë edhe se kjo
dije mund të kthehet në pushtet e në fakt, po kthehet në pushtet. E sa herë duhet
administruar pushteti kemi të bëjmë me detyrën, që sjell probleme etike.