Benedikti XVI në lutjen e Engjëllit të Tënzot i ftoi të krishterët të rizbulojnë vlerën
e Sakramentit të Rrëfimit.
(16.2.2009 RV)Benedikti XVI në lutjen
e Engjëllit të Tënzot i ftoi të krishterët të rizbulojnë vlerën e Sakramentit të Rrëfimit.
Në Sakramentin e Pendesës, Krishti na pastron me mëshirën e vet të pakufishme: ky
është reflektimi që Papa u ofroi besimtarëve, dje në mesditë gjatë lutjes së Engjëllit
të Tënzot në Sheshin e Shën Pjetrit në Vatikan. Benedikti XVI e komentoi pjesën
e Ungjillit të Liturgjisë të së dielës, e cila përshkruan shërimin e mrekullueshëm
nga Jezusi të një të sëmuri nga gërbula. Papa i ftoi besimtarët të kërkojnë mbështetje
në Sakramentin e Rrëfimit, për të cilin tha se duhet të rizbulohet në rëndësinë dhe
vlerën që ka për jetën shpirtërore. Duke komentuar pjesën e Ungjillit të së dielës
mbi mrekullinë e shërimit të të gërbulurit nga Jezusi, Papa shpjegoi se sipas ligjit
të vjetër hebraik, "gërbula konsiderohej jo vetëm si sëmundje, por si forma më e rëndë
e papastërtisë (fëlliqësisë) për kultin" që sillte largimin e të gërbulurit nga komuniteti
deri në shërimin e mundshëm: " Prandaj gërbula përbënte një lloj të vdekjes
fetare e civile, e shërimi i saj konsiderohej si një lloj ringjalljeje. Në gërbulë
është e mundur të ravizohet simboli i mëkatit, që është papastërtia e vërtetë e zemrës,
që na largon prej Zotit. Në të vërtetë nuk është sëmundja fizike e gërbulës, siç parashikonin
rregulloret e vjetra, që na ndan prej Tij, por faji, është e keqja shpirtërore e morale".
"Mëkatet që bëjmë – vijoi Papa – na largojnë prej Zotit e, në se nuk rrëfehen përvujtërisht,
duke besuar e duke u mbështetur në Mëshirën Hyjnore, arrijnë të na shkaktojnë deri
edhe vdekjen e shpirtit". Prandaj shërimi i të gërbulurit është gjest me vlerë të
jashtëzakonshme: "Kjo mrekulli atëherë merr një vlerë të fortë simbolike.
Jezusi, siç pati profetizuar Izaia, është Shërbëtori i Zotit që "i mori mbi vete
vuajtjet tona, mbi shpatulla të veta i ngarkoi dhimbjet tona” (Iz 53,4). Në mundimet
e tij, Jezusi do të bëhet si i gërbuluri, i papastër prej mëkateve tona, i ndarë prej
Zotit: të gjithë këtë Ai do ta bëjë për dashuri, me qëllim që të nxjerrë e të fitojë
për ne pajtimin, faljen e shpëtimin". E në vazhdim të reflektimit, Papa nënvizoi
se si në Sakramentin e Pendesës, Krishti i kryqëzuar e i ngjallur, përmes mbarështuesve
të tij, "na pastron me mëshirën e vet hyjnore, na kthen në bashkimin tonë me Atin
qiellor e me vëllezërit tanë, na dhuron dashurinë e tij, gëzimin e paqen e tij". E
këtu Papa i drejtoi një thirrje besimtarëve: "Të dashur vëllezër e motra,
t'i lutemi Virgjërës Mari, të cilën Hyji e ka ruajtur nga çdo njollë mëkati, të na
ndihmojë t'i shmangemi mëkatit e të frekuentojmë rregullisht Sakramentin e Rrëfimit,
Sakramentin e Faljes, që sot duhet rizbuluar edhe më shumë në vlerën dhe rëndësinë
e vet për jetën tonë të krishterë". "Ungjilli i kësaj së diele – tha pastaj
Papa duke iu drejtuar shtegtarëve në gjuhën polake – na tregon Jezusin i cili, duke
e shëruar të gërbulurin, përkulet mbi mjerimin, mbi sëmundjen e mbi vuajtjen njerëzore".
Këtë Jezusi e bën, vërejti Papa –"plot përdëllim, respekt dhe falas". Duke takuar
mjerimin njerëzor, bëri thirrje Papa, ta "imitojmë Jezusin, duke i dhënë të afërmit
ndihmën tonë konkrete, një fjalë shprese e një gjest ngushëllimi".