Benedikti XVI hebrenjve amerikanë: i prerë refuzimi i antisemitizmit. Po përgatis
vizitën time në Izrael.
(12.02.2009 RV)E papranueshme dhe
e patolerueshme të harrohet ose të minimizohet krimi i tmerrshëm i shfarosjes së hebrenjve
gjatë Luftës II Botërore. Kështu i tha sot paradite Benedikti XVI delegacionit të
Konferencës së kryetarëve të organizatave kryesore hebraike amerikane, të cilin e
priti në Vatikan. Papa ripohoi me forcë se Kisha refuzon prerë çdo formë antisemitizmi
dhe lajmëroi se po përgatit vizitën e tij në Izrael: The Church is profoundly
and irrevocably committed to reject all anti Semitism… “Kisha është thellësisht
dhe prerazi e impenjuar që të refuzojë çdo formë antisemitizmi dhe të vazhdojë të
çimentojë marrëdhënie të mira e të qëndrueshme” ndërmjet katolikëve dhe hebrenjve.
Papa përsëriti se urrejtja kundër burrave, grave e fëmijëve, që u tregua gjatë tragjedisë
së Holokaustit, ishte krim kundër Zotit e kundër njerëzimit: This should
be clear to everyone… “Kjo – paralajmëroi Ati i Shenjtë – duhet të jetë
e qartë për këdo”, sidomos për ata që ndjekin traditën e Shkrimit të Shenjtë, sipas
të cilit çdo njeri është krijuar në shembëlltyrë e përngjasim me Zotin. Çdo mohim
apo përpjekje për t’i zvogëluar përmasat e këtij krimi është e patolerueshme dhe e
papranueshme, theksoi Papa: This terrible chapter in our history must never
be forgotten… “Ky kapitull i tmerrshëm i historisë sonë – tha akoma – nuk
duhet harruar kurrë”. Kujtimi i këtyre ngjarjeve duhet të jetë paralajmërim për të
ardhmen dhe duhet të na shtyjë drejt përpjekjeve për pajtim, duke bërë ç’është e mundur
që katastrofa të tilla të mos përsëriten më. Papa siguroi se do të lutet që kujtimi
i këtij krimi të frikshëm të forcojë vendosmërinë për të shëruar plagët e hapura prej
shumë kohe në marrëdhëniet ndërmjet katolikëve e hebrenjve. Benedikti XVI përmendi
më pas vizitën e tij në Sinagogën e Nju Jorkut, më 2008, në Këln, më 2005, e sidomos
vizitën prekëse në kampin e shfarosjes të Aushvic-Birkenaut: As I walked
through the entrance to that place of horror… “Në çastin kur kapërceva
hyrjen e atij vendi të tmerrshëm – kujtoi – meditova mbi numrin pa fund të të burgosurve”
që kanë hedhur hapa në Aushvic e në kampe të tjera përqëndrimi. Bijtë e Abrahamit,
vazhdoi Papa Racinger, duke iu referuar hebrenjve, nuk kishin mbështetje tjetër, veçse
fenë e etërve të tyre në Zot, fe që ne të krishterët e bashkëndajmë me ta. Njerëzimi
mbarë, pohoi Ati i Shenjtë, turpërohet thellësisht për brutalitetin e skajshëm, që
u tregua ndaj popullit hebre. E këtu, Papa lajmëroi se po përgatit vizitën në Izrael: A
land which is holy for Christians as well as Jews… “Një tokë e shenjtë
për të krishterët e për hebrenjtë, sepse rrënjët e fesë sonë janë aty”. Benedikti
XVI shpjegoi se identiteti i krishterë është ngushtësisht i lidhur me atë hebraik,
megjithëse marrëdhëniet ndërmjet dy feve monoteiste nuk kanë qenë gjithnjë të shkëlqyera.
Por, nuk duhet t’i lemë vështirësitë e së kaluarës të pengojnë forcimin e miqësisë
mes nesh, pohoi Papa, i cili kujtoi më pas Deklaratën konciliare “Nostra Aetate”,
që përvijon mirë qëndrimin e Kishës ndaj marrëdhënieve katolikë-hebrenj. Benedikti
XVI nuk mungoi të kujtojë vizitën e Gjon Palit II në Murin e Lotëve në Jeruzalem,
duke i bërë të tijat fjalët e lutjes, që la aty Papa Vojtila: O Zot i etërve tanë,
“duke të kërkuar falje, duam të impenjohemi për vëllazërimin e vërtetë me popullin
e aleancës”. Nga ana e tij, rabini Artur Shnajer, në krye të delegacionit e falenderoi
Papën, i cili, sipas rabinit, e kuptoi dhimbjen dhe ankthin e hebrenjve pas deklaratave
negacioniste të ipeshkvit lëfevrian Uiljamson, duke shprehur solidaritetin e padiskutueshëm
për popullin hebre. Të njëjtin qëndrim mbajti edhe kryetari i organizatave hebraike
amerikane, Alan Solou, i cili theksoi se izraelitët presin me padurim vizitën e Papës
në Tokën Shenjte, “me domethënie të jashtëzakonshme për të dyja fetë”.