Viktimat e sistemit komunist perkujtohen nga Kisha katolike 20 vjet pas rënies së
këtij regjimi
(10.2.2009 RV)Kryetarët e Konferencave Ipeshkvnore Katolike të Evropës qendrore
e lindore përkujtuan sot në Zagreb viktimat e sistemit komunist, 20 vjet pas rënies
së këtij regjimi. Takimi i tretë i Kryetarëve e Kardinajve të Konferencave Ipeshkvnore
të Vendeve të Evropës qendrore e lindore pas takimeve që u mbajt në Budapest në 2004
e në Pragë në vitin 2007, sivjet në Zagreb pati për temë: “Misionin e Kishës në Evropën
Qendrore-Lindore njëzetë vjet pas rënies së sistemit komunist (1989-2009). Në takim
mori pjesë edhe Kryetari i Konferencës Ipeshkvnore Katolike të Shqipërisë imzot Rrok
Mirdita, i cili foli mbi Kishën katolike në Shqipëri nga periudha e rënies së komunizmit
e deri më sot, por duke kujtuar në mënyrë të veçantë persekutimin e egër të regjimit
të Enver Hoxhës kundër Kishës katolike dhe dëshminë e jashtëzakonshme ungjillore që
dhanë ipeshkvijë, meshtarë, rregulltarë e besimtarë laikë që flijuan jetën me martirizim
për fenë në Krishtin, për lirinë e Kishës e të popullit dhe e për dashurinë ndaj atdheut.
Takimi u mbajt pikërisht në ditën e festës të të Lumit kardinalit martir, Alojzije
Stepinac, kryeipeshkëv i Zagrebit, për të përkujtuar së bashku më të, të gjitha viktimat
e regjimit komunist që ka mbjell vdekje e shkatërrim në Shqipëri e në Vendet tjera
të Evropës qendrore e lindore. Takimi është një rast i volitshëm për një hov të ri
e të guximshëm ungjillëzimi përmes të cilit në këto Vende duhet rizbuluar përherë
më tepër rrënjët e krishtera e rivendosur një qytetërim vërtet më njerëzor.