Kardinal Bertone ambasadorëve të Bashkimit Evropian: ndihmojeni Afrikën e Tokën e
Shenjtë dhe miratoni politika, që ndihmojnë familjet.
(10.02.2009 RV)Sekretari i Shtetit të Vatikanit, kardinal Tarçizio Bertone
takoi sot në Romë, ambasadorët e Bashkimit Evropian. U kërkoi të marrin pjesë më shumë
në plotësimin e kërkesave të kontinenteve të tjera e t’i kushtojnë sidomos vëmendje
të veçantë Afrikës dhe Tokës Shenjte. Gjithashtu, u kujtoi se për të pasur shoqëri
të qëndrueshme duhen familje të shëndosha. Prandaj, i inkurajoi ta venë në diskutim
kulturën e konsumizmit e të hedonizmit e të mbështesin jetën dhe familjen. Bertone
vuri në dukje se shpesh, kontaktet me vendet afrikane merren vetëm për qëllime shfrytëzimi.
Bashkimi Evropian duhet të jetë më aktiv në zgjidhjen e konflikteve në kontinentin
e zi, në luftën kundër padrejtësive që i kanë shkaktuar dhe në ndihmën për refugjatët.
Shqetësimi i Kishës Katolike për Afrikën, shpjegoi prelati, e ka burimin në frymën
e Ungjillit, prandaj ajo punon pa u lodhur për t’i bërë afrikanët, gjithnjë e më tepër,
protagonistë të fatit të tyre, të zhvillimit të tyre kulturor, civil, shoqëror e ekonomik.
Disa, rrugët për të ndihmuar Afrikën, që nga respektimi i impenjimeve tregtare, tek
shlyerja e borxheve të jashtme, tek ndihma për bujqësinë e për mjekësinë, tek lufta
kundër tregtisë së armëve, trafikut të paligjshëm të lëndëve të para, pastrimit të
parave, korrupsionit. Sekretari i Shtetit të Vatikanit vuri përpara ambasadorëve
të Bashkimit Evropian edhe gjendjen në Tokën Shenjte, duke theksuar se Brukseli nuk
mund të qëndrojë duarlidhur. Por, për të kuptuar më mirë problematikën e zonës, sqaroi
kardinal Bertone, duhen respektuar aspiratat e të gjitha popullsive, të përfshira
në konfliktin e Lindjes së Mesme. Ndërkaq, në Rripin e Gazës duhen garantuar ndihmat
humanitare dhe duhen detyruar palët të mos ndjekin llogjikën e dhunës, por atë të
dialogut e të paqes. Përsa i përket Evropës, kardinali kërkoi që të dëgjohen
më shumë vendet ish-komuniste e të përdoret përvoja e tyre për të përballuar sfidat
e përbashkëta. Së fundi, Bertone rekomandoi një kujdes më të madh për familjen, përmes
zbatimit të politikave që mbrojnë të drejtat e saj, jetën e edukimin e mirë të fëmijëve.