E mira e njeriut dhe e mira e kombit, janë pikat konvergjente ndërmjet Kishës e Shtetit
në Brazil. Kështu Benedikti XVI ambasadorit të ri të Brazilit në Vatikan.
E mira e njeriut dhe e mira e kombit, janë pikat konvergjente ndërmjet Kishës e Shtetit
në Brazil. Kështu tha Benedikti XVI para ambasadorit të ri të Brazilit në Vatikan.
“Dashamirësi të sinqertë e vlerësim të posaçëm për kombin fisnik” brazilian shprehu
Papa sot me rastin e paraqitjes së Letrave kredenciale të ambasadorit të ri të Brazilit
pranë Selisë së Shenjtë, Luis Felipe de Seixa Korrea, të cilin e porositi që Vendi
i tij të impenjohet për paqen botërore dhe mbrojtjen e parimeve themelore, në mënyrë
të veçantë atë të sakralitetit të jetës njerëzore. I martuar, me katër fëmijë, doktoruar
në Drejtësi, de Seixas Korrea ka qenë ambasador i Brazilit në Meksikë, Spanjë, Argjentinë,
Gjermani, si dhe përfaqësues në Gjenevë, e pranë institucioneve të ndryshme në OKB. “Synimi
i përbashkët, si ai i Kishës, me misionin e saj të natyrës fetare e shpirtërore, ashtu
dhe ai i Shtetit, megjithëse i ndryshëm nga ai i Kishës, duhet të jetë: e mira e qenies
njerëzore dhe e mira e përbashkët e Kombit”. Këtë pohoi Papa Benedikti XVI, duke përmendur
edhe Marrëveshjen e kohëve të fundit ndërmjet Shtetit e Kishës, marrëveshje, e cila
përcakton statusin juridik civil të Kishës katolike braziliane si “bashkëpunim të
sinqertë” me qeverinë. Papa kujtoi se “Brazili është vend që ruan e kultivon në pjesën
më të madhe të popullsisë fenë e krishterë. Ungjillëzimi i popullsisë braziliane është
bërë prej më se pesë shekujsh”. Në anën tjetër, Papa tha se shpreson që “në përkim
me parimet që mbrojnë dinjitetin njerëzor, të cilat Brazili i ka mbrojtur gjithmonë,
të vijohet në promovimin dhe përhapjen e vlerave themelore njerëzore”, duke njohur
“në mënyrë të qartë sakralitetin e jetës familjare e mbrojtjen e foshnjave që nga
zënia e deri në mbarimin natyror të jetës”. Lidhur me eksperimentimet biologjike,
Papa Benedikti XVI porositi “mbrojtjen e një etike, që nuk e shpërfytyron e që mbron
ekzistencën e embrionit dhe të drejtën e tij për të lindur”. Më tej në audiencë
me ambasadorin e ri të Brazilit pranë Vatikanit, Papa shprehu kënaqësinë e tij që
në Brazil është kthyer “një atmosferë prosperiteti, faktor nxitës edhe për zhvillimin
e zonave të afërta kufitare e të vendeve të ndryshme afrikane” si dhe për impenjimin
e solidaritetin e qeverisë braziliane në luftën kundër varfërisë e prapambetjes teknologjike. Së
fundi, Papa tërhoqi vëmendjen para “rreziqeve të konsumizmit e hedonizmit si dhe të
mungesës së parimeve të forta morale”, që e bëjnë të brishtë strukturën e shoqërisë
e të familjes braziliane. Prandaj, është urgjent “formimi i qëndrueshëm moral në të
gjitha nivelet, përfshirë këtu edhe fushën politike”, para kërcënimeve që burojnë
prej ideologjive materialiste dominuese, e tundimeve të korrupsionit në menaxhimin
e parave publike e private.