Գերմանիա - հայկական նոր եկեղեցիի բացում։,

Գերմանիա - հայկական նոր եկեղեցիի բացում։,

Վերջերս, Գերմանիոյ Սաքսոնիա Անհալտ շրջանի Հալլէ քաղաքին մէջ բացումը կատարուեցաւ հայկական նոր եկեղեցիի մը, որուն օծումը պիտի կատարուի յառաջիկայ ամիսներուն։

Հալլէի հայ համայնքի հոգեւոր հովիւ Մկրտիչ Այվազեան յայտնեց, թէ եկեղեցւոյ անուանակոչութիւնը պիտի կատարուի օծման օրը։ Եկեղեցւոյ շէնքը շուրջ 30 հազար եւրոյի արժէքով ձեռք բերուած է տեղի հայ համայնքին եւ Գերմանիոյ հայոց առաջնորդարանին միջոցներով, ապա շէնքը վերանորոգուած է հայկական եկեղեցիի յատուկ ոճով։ Անդրադառնալով Գերմանիոյ հայկական գաղութին՝ Այվազեան նկատել տուաւ, թէ Գերմանիոյ մէջ ներկայիս կը գործեն շուրջ 40 հայկական միութիւններ, որոնցմէ 15-ը եկեղեցական համայնքներ են։ Գերմանիոյ Հայ ակադեմականներու մշակութային միութեան նախագահ, պատմաբան Ազատ Օրտուխանեան որ Պոքում քաղաքի Ռուհր համալսարանին մէջ պատմութեան ամպիոնի դոկտորականի թեկնածու է , իր կարգին նշեց, թէ Հալլէի մէջ կապրի 40-45 հայ ընտանիք։ Անոնց մեծ մասը հայաստանցի է . գաղութը ունի նաեւ՝ հայկական շաբաթօրեայ դպրոց եւ պարախումբ։ Ան յայտնեց, թէ Գերմանիոյ մէջ հայկական եկեղեցական համայնքները կազմուած են թրքահայերէ, որոնց անդամավճարներով կը գոյատեւեն հայկական եկեղեցիները։ Հայաստանցիները, պարսկահայերը, լիբանանահայերը եւ սուրիահայերը կը գործեն քաղաքական, գիտական-մշակութային ու բարեգործական կազմակերպութիւններու մէջ։ Ազատ Օրտուխանեան հաստատեց, թէ Հալլէի եկեղեցական միութեան նոր շէնքը եզակի դէպք է, որովհետեւ Գերմանիոյ մէջ Հայաստանի դեսպանատան շէնքէն ետք, այս շէնքը, հայկական երկրորդ սեփականութիւնն է։ Հալլէի մէջ կը գործէ նաեւ՝ հայկական ՜՜Մեսրոպ՝՝անուան հետազօտական կեդրոնը։