Sot u përkujtua Shën Agia, apo Agata, Pajtore e Katanies, në Itali.
(05.02.2009 RV)Agata, që do të thotë "e mirë", u martirizua kur ishte vetëm
13 vjeç, në vitin 250 nga Kosulli Kuinciano, sepse nuk pranoi të bëhej gruaja e tij.
Kujtohet nga Kanuni i lashtë i Meshës si shembull virtyti heroik. Bijë e një familjeje
fisnike, me një bukuri të rrallë fizike e shpirtërore, ajo nuk u tremb nga torturat
e shërbëtorëve të Kuincianit, që arritën deri atje, sa t'ia coptonin trupin, duke
i prerë edhe gjirin, siç paraqitet në ikonografi. Ashtu, të coptuar, e sollën para
Kuincianit i cili, si e pa se vijonte të përflakej vetëm nga dashuria hyjnore, e
hodhi mbi thëngjij të ndezur, ku buzët e saj të shkrumbuara, pëshpëriten lutjen e
fundit, para se t'ia dorëzonte shpirtin Zotit.Shenjtja është shumë e nderuar ndër
shqiptarët. Emrin e saj e mbajnë shumë vajza e gra shqiptare në trajtën Age, Agetinë,
Tinë, Agi. Age quhej edhe motra e Nënë Terezës.