1-га лютага ў Маскве адбылася інтранізацыя шаснаццатага Патрыярха Масквы і Усяе
Русі Кірыла. Літургія была адслужана ў галоўнай Сьвятыні Расіі ў Царкве Хрыста Збавіцеля. У
часе інтранізацыі, згодна з гістарычнаю традыцыяю, Мітрапаліты Кіева і Мінска: Уладзімір
і Філярэт, вядучы Патрыярха Кірыла пад рукі, тры разы пасадзілі яго на патрыяршым
троне. У гэтым часе былі чутныя вокрыкі арцыбіскупаў ў грэцкай мове “axios”, значыць
“годзен”. Гэтае кліканьне перанялі прысутныя ў сьвятыні вернікі. Затым субдыяканы
знялі з Патрыярха Кірыла арцыбіскупскую вопратку і ўсклалі на яго патрыяршую вопратку:
саккос значыць аздобную рызу, амафор значыць шырокі епітрахіль а на галаву ўсклалі
патрыяршую мітру. Перад заканчэньнем Літургіі мітрапаліты, якія ўдзельнічалі ў ёй,
ўсклалі на новага Патрыярха зялёную патрыяршую мантыю і ўручылі яму жэзл (пастарал)
Сьвятога маскоўскага мітрапаліта Пятра, які спэцыяльна з гэтае нагоды выпазычылі
з крэмлёўскага музэя. На ўрачыстасьці былі прысутнымі прадстаўнікі найвышэйшых
дзяржаўных уладаў, а сярод іх Дмітрый Медведеў з жонкаю ды Уладзімір Путін. Ягоная
жонка Сьветлана, была першаю асобаю, якая прыняла Сьвятое Прычасьце з рук Патрыярха
Кірыла. На ўрачыстасьць прыбылі прадстаўнікі мясцовых Праваслаўных Цэркваў, Ватыкану
і найбольшых Пратэстанцкіх Цэркваў. Ватыканскую дэлегацыю ўзначальваў кардынал
Вальтэр Каспэр, старшыня Папскае Рады да спраў Адзінства Хрысьціян. 1-га лютага,
дзень інтранізацыі Кірыла ды яго імяніны 24-га мая, ва ўспамін Апосталаў Славян Кірыла
і Мятода, будуць афіцыяльнымі сьвятамі Расійскага праваслаў”я. Зберажэньне еднасьці
Царквы і прыцягненьне да яе вернікаў—такія галоўныя заданьні пералічыў ў казаньні
Кірыл. Падкрэсьліў, што паводоле яго “Патрыярх павінен турбавацца пра тое, каб кожны
чалавек знайшоў уласнае месца ў Царкве, ды адначасна, каб іншыя погляды не зьнішчылі
любові і не паслабілі супольных намаганьняў у будаваньні Божага дому”. Патрыярх Кірыл
заўважыў, што асабліва моладзь патрабуе духоўнага кіраўніцтва Царквы. “У часах маральнага
рэлятывізму, калі насільле і распуста крадуць душы маладых людзей, мы не можам сядзець
і чакаць, аж моладзь вернецца да Хрыста”- сказаў Патрыярх Кірыл. На заканчэньне зрабіў
заклік да духавенства, каб міма цяжкасьцяў намагаліся прыцягнуць людзей да Бога і
паказаць ім сапраўдны сэнс жыцьця.