Papa kërkon baza etike për ekonominë e politikën si edhe garanci për familjen në audiencën
me ambasadorin hungarez
(02.02.2009 RV)Tjetër audiencë
e Papës Benedikti XVI po sot, kësaj radhe me ambasadorin e ri hungarez në Vatikan.
Të drejtat e njeriut, familja dhe roli i Kishës në shoqërinë hungareze: këto ishin
temat kryesore të bisedës. Ati i Shenjtë nënvizoi “horizontet e reja të shpresës
për të ardhmen”, që hapën rifillimi i marrëdhënieve diplomatike të Vatikanit me vendet
e ish-bllokut komunist, pas 1989-ës. Vuri në dukje përparimet e bëra nga Hungaria
gjatë këtyre 20 vjetëve, për të bërë të qëndrueshme strukturat e një shoqërie të lirë
e demokratike, ku Kisha nuk kërkon privilegje, por dëshiron të luajë rolin e vet,
besnike ndaj natyrës dhe misionit që ka. Vetëm kohët e fundit, Selia e Shenjtë dhe
Hungaria kanë nënshkruar dy memorandume për asistencën fetare të Forcave të Armatosura
dhe të Policisë së kufirit. Më pas, Papa rekomandoi që qeverisja e ekonomisë
dhe e politikës të bazohet mbi etikën, duke i dhënë gjithnjë përparësi dinjitetit
dhe të drejtave të njeriut, si edhe së mirës së përbashkët të njerëzimit. “Përvoja
e lirive të reja – tha Benedikti XVI duke iu referuar vendeve të Lindjes – nganjëherë
ka sjellë me vete rrezikun që këto vlera të krishtera e njerëzore, kaq të rrënjosura
në historinë e kulturën e secilit popull dhe të krejt kontinentit evropian, të zëvendësohen
nga të tjera, të bazuara mbi një këndvështrim jo të drejtë për njeriun e dinjitetin
e tij dhe të rrezikshme për zhvillimin e një shoqërie vërtet të përparuar”. Në
këtë kontekst, Ati i Shenjtë theksoi rëndësinë parësore të familjes për të krijuar
marrëdhënie bashkëjetese paqësore në çdo nivel. U kërkoi qeveritarëve ta mbështesin
familjen, duke u siguruar prindërve të drejtën primare të edukimit të fëmijëve, edhe
duke zgjedhur një shkollë fetare për ta.