(01.02.2009 RV)Hong Kong: Të krishterët e Hong Kongut e kremtuan Vitin e ri
kinez me vepra solidariteti, ndihme e bashkimi, në atmosferën e krizës financiare
botërore, që peshon rëndë edhe mbi festat. Udhëheqësit e bashkësisë së krishterë,
në mesazhin e Krishtlindjes, i patën ftuar besimtarët të mos e shikojnë konsumizmin
si të vetmin burim të lumturisë. Sipas buletinit dioqezan, në variantin kinez Kong
Ko Bao, shumë nga bashkësitë e krishtera u aktivizuan për t’u treguar konkretisht
njerëzve kuptimin që ka fillimi i një vitit të ri për të krishterët, e sidomos për
katolikët. Duhet ta falënderojmë Zotin për çdo vit të ri që na dhuron e të kuptojmë
çka është vërtetë e nevojshme për jetën njerëzore, e çka shërben vetëm për të plotësuar
disa kënaqësi, që nuk e pasurojnë aspak njeriun, përkundrazi - shkruhet në Buletin.
Taiwan:
Ndërsa imzot Xhon Hunf, kryeipeshkëv i Tai Pei-t e kryetar i Konferencës ipeshkvnore
të Taivanit, në mesazhin e tij për Vitin e Ri kinez, i porosit besimtarët të mos
e harrojnë identitetin e tyre të krishterë, dmth të mos e harrojnë gëzimin që buron
nga takimi me Krishtin e dashurinë e krishterë, posaçërisht ndaj më të varfërve. Në
atmosferën e krizës globale - shkruan ipeshkvi - ne nuk mund e nuk duhet të trembemi.
Po të besojmë ngultas se Zoti është me ne, s’ka gjë në botë që mund ta trazojë paqen
tonë shpirtërore. Nuk ka forcë që mund të na e rrëmbejë gëzimin, që vetëm Zoti di
ta japë”.
Kinë: Këto ditë në dioqezën e Nan Kong, në zonën Da Zhou
të Kinës kontinentale, u mbajt seminari i tretë teologjik për vitin kushtuar Shën
Palit Apostull, me temë “Fryma misionare e Shën Palit”. Më se 100 meshtarë, rregulltarë,
rregulltare e besimtarë, të ardhur nga të katër anët e dioqezës, diskutuan për të
thelluar njohjen dhe vlerën aktuale të letrave të Apostullit të Popujve, duke i lidhur
ngushtë me realitetin e jetës së përditshme në dioqezë. Dioqeza e Nan Kong, zonë e
tronditur nga tërmeti i fortë i 12 majit të kaluar, vijon të ndjekë programin për
kremtimin e vitit kushtuar Shën Palit sipas kalendarit, i cili përcakton katër faza:
studimin e Letrave; të teologjisë; të metodës misionare dhe të meditimit, duke përfshirë
kështu gjithë veprimtarinë e Shën Palit.
Vietnam: Një mision ndihme
e solidariteti kryen këto ditë në Vietnam disa ipeshkvij amerikanë, që vizituan Hanoin.
Ipeshkvijtë ishin vizitorët e parë të huaj, që hynë në vendin aziatik, pas sulmit
të autoriteteve vendase kundër të krishterëve për truallin e ish-delegacionit apostolik.
Gjatë vizitës u bënë edhe disa vëllazërime ndërmjet dioqezave amerikane e atyre vietnameze.
Ipeshkvijtë amerikanë kremtuan një Meshë shenjte në katedralen e Shën Jozefit.