Filloi zgjedhja e Patrikut të Moskës e të gjithë Rusive
(27.01.2009 RV)Filluan sonte zgjedhjet për kreun e ri shpirtëror të Kishës
ortodokse ruse. Mëse 700 delegatë, tri për çdo dioqezë (një pop, një murg e një besimtar
i thjeshtë) janë mbledhur në Katedralen e Krishtit Shpëtimtar për të votuar Patrikun
e 16-të të Moskës e të gjithë Rusive, të cilit do t’i takojë të vendosë distancën
që dëshiron të mbajë Kisha ortodokse me Kremlinin dhe me Vatikanin. Peshkopët kanë
zgjedhur tashmë të dielën e kaluar, tri kandidatë, por emri mund të jetë edhe i ndryshëm
prej tyre. Zgjedhja bëhet me shumicë absolute dhe duhet të përfundojë të enjten. Të
tri kandidatët e peshkopëve, nënvizon gazeta “Times” e Londrës, dyshohen si ish-agjentë
të KGB-së, ashtu siç dyshohej edhe Patriku Aleksej II, në krye të Kishës me 165 milion
besimtarë, që nga viti 1990 e deri në vdekjen e tij, dhjetorin e kaluar. Tri kandidatët
janë: metropoliti i Smolenskut e Kaliningradit, Kirill, përgjegjës i marrëdhënieve
me jashtë, i cili është në favor të afrimit me Kishën Katolike e të pavarësisë nga
pushteti politik; pastaj, metropoliti i Kalugës dhe i Borovskut, Kliment, konservator,
i afërt me Vladimir Putin; së fundi, metropoliti i Minskut dhe i Slutskut, kreu i
Kishës bielloruse, Filaret, i lidhur me presidentin Aleksandër Llukashenko.