Ватыкан: ёсьць шанцы на плённы каталіцка-праваслаўны дыялог
«Ёсць шансы на плённы каталіцка-праваслаўны дыялог», — сцвярджае на старонках «L’Osservatore
Romano» кс. прэлат Элеўтэр’ё Фартыно. Памочнік сакратара Папскай рады спрыяння хрысціянскаму
адзінству інфармуе аб працы каардынацыйнага камітэта перад ХІ Пленарным пасяджэннем
Міжнароднай каталіцка-праваслаўнай камісіі на Кіпры, якое запланавана на 16–23 кастрычніка
2009 г.
Кастрычніцкая сесія будзе прысвечана тэме «Роля біскупа Рыма ў
адзінстве Касцёла першага тысячагоддзя». Унесена прапанова падчас тыднёвага пасяджэння
на Кіпры закрануць такія пытанні, як: Рымскі Касцёл — першая сталіца хрысціянства,
біскуп Рыма — наступнік св. Пятра, роля біскупа Рыма ў перыяд крызісаў касцёльнай
супольнасці, а таксама ўплыў пазатэалагічных фактараў.
Ксёндз прэлат Фартыно
адзначыў, што супольны аналіз гістарычных фактаў, інтэрпрэтацыя біблійных тэкстаў,
а таксама разгляд розных тэалагічных пытанняў з’яўляюцца «істотнай умовай сапраўднага
прагрэсу ў пошуку ўзаемнага паразумення католікаў і праваслаўных». На яго думку, каталіцка-праваслаўны
дыялог знаходзіцца на складаным этапе, які, аднак, можа адкрыць шлях да поўнага адзінства,
што мае істотнае значэнне для жыцця і місіі Царквы ў свеце. «Дыялог абодвух бакоў
у сваёй новай фазе адкрыты і мае наперадзе пазітыўныю перспектыву», — лічыць памочнік
сакратара Папскай рады спрыяння хрысціянскаму адзінству.