Gazeta e Vatikanit për Obamën: nuk krijon iluzione, por besim tek politika
(22.01.2009 RV)Gazeta e Vatikanit “L’Osservatore Romano” komenton fjalimin
e mbajtur nga presidenti i ri amerikan, Barak Obama në ceremoninë e marrjes së detyrës.
“Nuk la vend për optimizëm të lehtë” e nuk ofroi “iluzione”, shkruan e përditshmja
e Selisë së Shenjtë. Në ditën, në të cilën në Uashington zhvillohet Marrshimi për
Jetën kundër abortit, temë që mund të shkaktojë probleme në marrëdhëniet e Obamës
me Kishën Katolike, gazeta eviton argumentin, për t’i lënë hapësirë thirrjes për “shpresë
në vend të frikës”, që presidenti i parë afro-amerikan i SHBA-ve u drejtoi bashkëqytetarëve
të tij nga Capitol Hill. “Deri tani – vë në dukje “L’Osservatore Romano” - merita
e madhe e presidenti Obama është se u ridha njerëzve besimin tek politika, u dha shpresën
se ajo mund të jetë me të vërtetë rrugë për të shërbyer të mirën e përbashkët, në
favor të të gjithëve e të secilit, si person i vetëm e si bashkësi. Duke i dëgjuar
nga goja e tij, njerëzit presin që shprehje si “të japim llogari për paratë e shtetit,
të shpenzojmë me mençuri apo të ndryshojmë mënyrën e jetesës” të kenë një domethënie
të vërtetë e autentike. Aspiratat janë të mëdha”, përfundon gazeta e Vatikanit.