Vizita e nuncit në Gazë për të çuar solidaritetin e Papës
(21.01.2009 RV)Ushtria izraelite përfundoi sot tërheqjen nga Rripi i Gazës,
ndërsa dje ndodhej për vizitë në rajon Sekretari i Përgjithshëm i OKB-së, Ban Ki-Mun.
Ai konstatoi personalisht dëmet e pësuara nga popullsia lokale dhe kërkoi masa urgjente
kundër Tel Avivit për bombardimet e ndërtesave të OKB-së në zonë. Sot në Gazë
ishte për vizitë edhe nunci në Izrael dhe legati apostolik për Jeruzalemin, imzot
Antonio Franko, i cili dorëzoi personalisht ndihmat e dërguara nga Papa Benedikti
XVI. “Pashë shumë shkatërrime, deklaroi nunci, por dëmet më të mëdha janë në zonat
periferike”. Në Meshën e kremtuar në famullinë e Familjes Shenjte, ndihej ndër besimtarët
shpresa që armëpushimi me Izraelin të vazhdojë, që të fillojë jeta normale e të bëhen
përpjekje të vërteta për arritjen e paqes. “Njerëzit – tha për agjensinë katolike
Sir, imzot Franko – janë të lodhur nga gjendja dhe nga pasiguria e së nesërmes”.