(18.01.2009 RV)Liturgjija e Meshës së soçme paraqet të parën mrekullí të Krishtit
e njiherit fillesën e jetës së tij publike. Âsht edhe rasa më të cilën ndërmjetsija
e Zojës në planin hyjnuer të Shëlbimit diftohet e plotfuqishme para të Birit të vet
Zot. Në zemër të vet nane, plot dashtëní ndaj të Birit e plot ambëlsim ndaj nesh,
i kujtohet ngushticës së dhandrrit, qi në sofrën e darsmës kishte mbetë pa venë. I
sjellet Krishtit dhe, para kohet, nxjerrë prej tij mrekullinë e shndërrimit t’ujit
në venë. Me praninë e vet në darsmën e Kanës, Krishti shêjtnon kunorën, tue e
naltue, kështu, bashkimin e ligjshëm të burrit e të grues në Sakramend të Testamendit
të Rí e, këndej, në gurrë hiri e themel të ripërtrîmit të shoqnisë njerzore. Me
mrekullinë e parë Ai çpall para njerzëve hyjninë e vet dhe njiherit pushteden ndërmjetëse
të Zojës. Kjo, në saje të Shëlbuesit, Zotnues mbi tana kreatyrët, Mbret fuqí–plotë,
Mesí i premutem dhe Zot (Antifona e të Hymit, Psalmi mbas Letrës e Kushtesa), mbas
Krishtit, âsht e gjithpushtedëshme për hir. Nji mrekullí e gjashme me atê, qi
na paraqet Ungjilli i soçëm, por shpirtnisht shum mâ e lartë, vërtetohet vazhdimisht
në jetën tonë të hirit. Krishti përmirëson natyrën njerzore, tue e naltue atê në natyrë
të vet; shndërron natyrën tande, tuj të bâ tý, i krishtênë, gjymtyrë të trupit të
vet; ndërron dita- ditës, në flijen e elterit bukën e venën në Mish e Gjak të vet
për të kenë Ai vetë ushqimi yt, jeta jote, gjallnija e rritja jote e mbinatyrëshme
e njiherit sigurija e shëlbimit tand. Jé gjymtyrë e Krishtit e mos harrò se, në
trupin mistik të tij, Zoti të ka caktue nji mision, nji barrë, nji detyrim (Letra).Diftou në jetë tande tokësore i dêjë për kaq e madhní dhe mbaju përherë ngjitë
me Krishtin me anën e dashtënisë ndaj tij e ndaj t’afërmit.
Meshari i të
kremteve, Perkthye dhe zhvillue prej At Danjel Gjeçajt OFM, Romë 1966, fq. 108-109