Dita botërore e emigrantit dhe e refugjatit: Kisha ua hap dyert gjithë njerëzve, pa
dallim race, kulture etnie
(18.01.2009 RV)Tema e Mesazhit të sivjetëm të Papës për Ditën botërore të emigrantit
dhe të refugjatit: “Shën Pali emigrant, Apostull i Popujve’, u zgjodh në përkim me
Jubileun e dymijëvjetorit të lindjes së Shenjtit. Emigrant tipik, i lindur nga hebrenj
emigrantë të Tarsit, të vendosur në Cilici, u edukua në gjuhën hebraike, greke e latine
dhe e kaloi gjithë jetën duke u endur deteve të Lindjes së afërme e rrugëve të Evropës,
derisa arriti në Romë, i nisur nga Antiokia, ku i kumtoi Ungjillin popullsive që i
përkisnin judaizmit e ku dishepujt e Krishtit u thirrën për të parën herë ‘të krishterë’.
Pali ia kushtoi gjithë jetën përpjekjes për ta bërë Jezusin të njohur e të dashur
në gjirin e të gjithë popujve sepse në Të, mbarë popujt janë të thirrur të bëhen një
popull i vetëm. E ky është edhe sot, në epokën e globalizimit, misioni i Kishës,
mision që u drejtohet të gjithë emigrantëve, studentë jashtë vendit, refugjatë e të
shpërngulur, duke përfshirë këtu edhe viktimat e skllavërisë moderne. Edhe sot duhet
propozuar mesazhi i shëlbimit me të njëjtin zell, që pati Apostulli dymijë vjet më
parë, duke pasur mirë parasysh situatat shoqërore e kulturore si dhe vështirësitë
e secilit emigrant e endacak. Kështu shprehet Papa në mesazh e në vijim i porosit
të gjitha Kishat të ushqejnë të njëjtin zell që pati Apostulli, për t’u kumtuar të
gjithëve dashurinë shpërblyese të Atit, duke fituar një numër sa më të madh njerëzish
për Krishtin. E kjo, sepse, siç shkruan Shën Pali në Letrat, Kisha nuk përjashton
askënd; përkundrazi, i ka dyert të hapura për të gjithë besimtarët, pa dallim kulture
e race: çdo i pagëzuar është gjymtyrë e gjallë e Korpit të vetëm të Krishtit. Prandaj
- porosit Papa - nuk duhet ta harrojmë kurrë dashurinë vëllazërore për të gjithë e
gatishmërinë për t’i dhënë ndihmesën tonë çdo njeriu, që ka nevojë për ne. E urdhëri
i dashurisë - përfundon Ati i Shenjtë - ushqehet kur dishepujt e Krishtit marrin pjesë
të bashkuar në tryzën e Eukaristisë, që është sakramenti i vëllazërimit e i dashurisë.