Ndihma humanitare e Papës për Gazën.

(17.01.2009 RV)Në emër të Benediktit XVI, Këshilli Papnor Cor Unum, dikaster i Selisë së Shenjtë që realizon nismat papnore të bamirësisë, dërgoi një shenjë personale e konkrete për të ndihmuar e për të mbështetur bashkësinë katolike të vogël, por plot gjallëri, të Gazës. Njoftimi jepet përmes një komunikate të Cor Unum. Ndihmat iu dorëzuan nga Atë Manuel Musalam, famullitar i Kishës së Familjes Shenjte Misionareve të Bamirësisë dhe Kongregatave të tjera fetare, që u shërbejnë njerëzve më të varfër në vendlindjen e Jezusit, e cila sot goditet rëndë nga vdekja, vuajtja e nga dëmet e rënda materiale, ndërsa lotët e pathara të popullsive tregojnë qartë sa e dëshëruar është paqja në këto vise. Benedikti XVI – kujton Cor Unum – u ka shprehur disa herë afërsinë vëllezërve e motrave të Rripit të Gazës, të cilët vuajnë prej vitesh për shkak të konfliktit të vazhdueshëm, që ka shkaktuar një krizë të rëndë humanitare.