Thirrja e Imzot Miljores: Civilëve në zonat e luftës u duhet garantuar sa më shpejt
siguria.
(15.01.2009 RV)“Situata dramatike në Gazë, në Kongo, në Irak e në Darfur tregon
se nuk po bëhet sa duhet për mbrojtjen e popullsive civile në zonat e luftës”. Këtë
denoncoi dje imzot Çelestino Miljore gjatë mbledhjes së Këshillit të Sigurimit të
OKB-së mbi mbrojtjen e civilëve të përfshirë në konfliktet e armatosura. Vëzhguesi
i përhershëm i Selisë Shenjte pranë Kombeve të Bashkuara ka nënvizuar edhe në të kaluarën
se shpesh për arsye politike apo ushtarake, dhunohen edhe të drejtat më themelore
të civilëve, sidomos ato të grave dhe të fëmijëve. Në këtë vit, që përkon me 60-vjetorin
e Konventës së Gjenevës, bashkësia ndërkombëtare duhet të impenjohet konkretisht për
të mbrojtur civilët të përfshirë në luftra, tha ndër të tjera Imzot Miljore, i cili
nënvizoi edhe tri pikat kryesore për t’i garantuar popullatës siguri: ndihmat humanitare,
mbrojtja e veçantë për gratë dhe fëmijët si edhe çarmatimi”.