(15.01.2009 RV)Poich’io non
spero di tornar giammai... Guido Cavalcanti
Shko ti...
Mbasi
qi stina po rrshet tatpjetë e fort un tutem se atdhén n’kët jetë me sýt adhruesa
, qi pajadá ia çmuen hirin s’kam për ta pá, shko, ti, lum bija,
n’at Shkodrën time kúr n’terr do t’sosem me trup e andrrime: atjè si t’gjindesh,
sýt e mij n’báll t’andin do t’hapen: n’tý kam m’u ngjáll. Për mue ti Shkodrën, për
mue sodite; mallin e sjellun dhe n’vorr, shafite. Shkodra me shpija
ndry n’avullija, t’qetat oborre plot land’ shatorre, kumbulla e manda, pjergulla
e tanda, sodit me at afshin qi kishe un gjáll - me mall t’im n’zêmër me
sý t’mij n’báll.
Jehona e së shkuemes
Me
réze t’derës qi t’parvet t’onë dorën u a njofti, zgjo nji jehonë përtîse
n’skutat mâ t’mshefta t’shpís qi flên tu’andrruemun ditt e lumnís. T’mdhajat
dritore hapja çardakut me ersín le t’ngîhet t’lulemustakut qi prej oborrit
nëpër múr zgjatet e mbrenda gêmat me i shtîm orvatet.
Dhuratat
e vjetra
Shko drejt te dhoma ku gjyshja e jote - nji zoj’ bujare
dhe njerziplote - mue gjí tue m’dhânun, n’prêhen tue m’rritun, dashtnisht m’a
rreshku shpirtin e mitun me nji të zjarrshëm et bukurije qi m’dhuroi
ândje, epshe lavdije, por dh’e përsolli krejt jetën t’ime me psime t’holla
e t’thella shqetime. Thith at erë arkash paje e musandrash, kujtim
i âmbël nusesh e dhandrrash, stinash hirplote t’kohës së shkueme kur n’djepa
tundej nji brezní e lume.
Ersimet e shpís
Përmallshëm siellu
npër shpí vetare përshkue me âmsime jete shqiptare, shetit banesën gjithkah,
moj njome, mos lên pa vrejtun asnjë skâj dhome, sepsè ndër skâje mbet e
harrueme era e reçelit dh’e bukës s’mbrueme, fryma e ‘i gjinije bekue prej Zotit q’endi
aty jetën nder stina t’motit.
Nji lvitje flatre
Ndoshta
ndër dhoma, n’çardak, n’ rrugina prap tue valvitun ndien melodina: një
lvitje dridhun flatre qi çilet e n’kopshtin tretet ndër lulevilet: shfrimet
e para jan’t’prillit t’êm kur m’kndonte zêmra si bylbyl n’gêm.
Roja
e shpís
N’ahër, lum bija t’lutem me zbritë: n’kandin
mâ t’errshëm, qi s’pau kurr dritë, kadalë avitu dhe shif
a del gjarpni qi mshehej dikúr n’themel: âsht roja e vjetër e shpís atnore, n’gurt
e themelit ora pajtore: mejher’ tue t’njoftun ka me t’përshndetë mbi
bisht i ngrejtun me krye përpjetë dhe pse s’t’ka pâmun kurr, n’er’t’gjakut ai
ka me t’njoftun si bij’ e oxhakut.
Dera e përtrime
Gjáll
po qe n’ahër vitorja e bardhë, gzou bijë e ime, pse n’mot për t’ardhë do
t’lulzoj’ rishtas e t’parvet dera me hove t’reja me gaze tjera dhe
shpirti, q’etënt n’tê kan dikue, me tharme nderi prap ka me vlue n’báll
të pinjojve ku si n’pasqyrë do t’ ndrisi gjaku qi ké n’fytyrë. Nuk jan’
kurr zhdukun n’rrib’ shekullore doket jetike t’gjindes arbnore: prap dyert ku
u ruejtën zakonet t’ona do t’lumnojn rishtas n’stinat mâ t’vona.
Romë,
prill 1964
Bija e vetme e Ernest Koliqit, Elizabeta Koliqi Olivieri, së
cilës i la trashigim emrin e ‘Zojës bujare e njerziplote shkodrane’ e sidomos, këtë
gur të çmueshëm, me vlerë të pallogaritshme, vdiq pak muaj më parë në shtëpinë e saj,
në rrethinat e Romës, pasi pati parë duke vdekur, pa lënë fëmijë, të vëllain, birin
e vetëm të Ernestit, Mark Koliqin.