U paraqit Takimi VI Botëror i Familjeve, që do të mbahet në Qytetin e Meksikos
(09 01.2009 RV)Pranë Sallës së
Shtypit të Selisë së Shenjtë u mbajt sot paradite konferenca për paraqitjen e Takimit
VI Botëror të Familjeve, që do të mbahet në Qytetin e Meksikos më 13 deri më 18 janar.
Tema e takimit është “Familja e edukon njeriun me vlera humane e kristiane”. Në takim,
ndërmjet të tjerëve, foli edhe kardinali Enio Antoneli, kryetar i Këshillit Papnor
për Familjen. Kisha e konsideron punën baritore me familjen si një nga detyrat
e dorës së parë, e vetë familjen, si levë themelore të ungjillëzimit të ri e si vatër
kryesore për transmetimin e fesë. Çdo brezni – tha kardinali – duhet të zgjedhë rrugën
e vet fetare, prandaj dëshmitë konkrete nga ana e familjes kanë një vlerë të pazëvendësueshme.
Përmes kësaj qelize themelore të shoqërisë – shtoi – kalon e ardhmja e vetë njerëzimit:
“Vlerat
themelore, virtytet shoqërore në shumicën e rasteve fitohen nga familja, nga përvoja
e ngrohtësisë së familjes, në gjirin e së cilës njeriu e ndjen se e duan e mëson
të dojë edhe të tjerët”.
Nga ky shkëmbim vlerash – shpjegoi Hirësia
e Tij - rrjedh pasuria e ndenjave njerëzore të solidaritetit, të dinjitetit të njeriut
e të drejtësisë. Por misioni i familjes – vërejti – minohet gjithnjë më shumë nga
një emergjencë e vërtetë edukative, nga shkëputja e lidhjeve ndërmjet breznive, pasojë
e mungesës së vlerave të përbashkëta dhe e relativizmit. Kësaj atmosfere, në të cilën
njeriu nuk e ka aspak të lehtë të orientohet, duhet t’i përgjigjen Kisha e shoqëria,
duke mbështetur fort familjen:
“Qëllimi kryesor, që duhet arritur, është
t’i bëjmë familjet gjithnjë e më të vetëdijshme për rolin e tyre, si subjekt i gjallë,
aktiv, veprues në Kishë e në shoqërinë civile. Është e nevojshme edhe që Kisha e shoqëria
t’i ndihmojnë familjet, për të qenë subjekt protagonist i ungjillëzimit e i humanizmit”.
Duke
iu përgjigjur pyetjes së një gazetari mbi krizën e sotme financiare botërore, kryetari
i dikasterit të Vatikanit pohoi se misioni edukativ i familjeve nuk varet nga situatat
e vështira. Ky mision vijon në çdo situatë, edhe atëherë kur familjes i duhet të kapërcejë
vështirësi të rënda:
“Ndërmjet dëshmive që do të japim në Qytetin
e Meksikos, së paku dy janë pikërisht të familjeve të varfëra, që bëjnë ‘mrekulli’
për t’i edukuar fëmijët e tyre e për të qenë të pranishëm, me shembullin e mirë,
edhe në jetën e familjeve të tjera”.
Kardinali shtoi,
më pas, se është shumë e rëndësishme që familjet të jenë të pranishme në politikë,
sepse kështu politikanët mund të njihen së afërmi me problemet e tyre, me sukseset
e dështimet, me të drejtat e detyrat, me kërkesat për punë e për shtëpi si dhe me
kërkesa të tjera të natyrshme të jetës në gjirin e familjes. Duhet njohur edhe vlera
e punës shtëpijake – shtoi kardinali – duke pasur mirë parasysh se nuk ka asnjë farë
dallimi ndërmjet punës që bën nëna, e cila nuk paguhet, e punës që bën shërbyesja,
që paguhet. Në përfundim kardinali Antoneli pohoi se selia dhe tema e takimit të ardhshëm
të familjeve, do të njoftohen nga vetë Papa, gjatë lidhjes televizive pas Meshës Shenjte
të së dielës 18 janar në Qytetin e Meksikos.