Në Betlehem arritën ipeshkvijtë e ‘Koordinimit’ për Tokën Shenjte.
(09.01.2009 RV)Ndërsa në Gazë luftohet, sot në Betlehem arritën ipeshkvijtë
anëtarë të ‘Koordinimit të Konferencave Ipeshkvnore në ndihmë të Tokës Shenjte’, organizëm
i krijuar në vitin 1998 me kërkesën e Selisë së Shenjtë. Ipeshkvijtë, që kryesohen
nga Konferenca ipeshkvnore e Anglisë, e bëjnë çdo vit këtë shtegtim, për t’u njohur
nga afër me problemet e Tokës ku lindi, predikoi, vdiq në kryq e u ngjall Jezu Krishti;
tokë ku zu fill krishterimi. Gjatë shtegtimit, që organizohet çdo vit në muajin janar,
ipeshkvijtë marrin pjesë në kremtimet e lutjes e i çojnë ndihmat e tyre solidare të
krishterëve vendas, të cilët jetojnë prej kohe në kushte jashtëzakonisht të vështira
konfliktesh e mungesash nga më të ndryshmet. Sivjet vëmendja e tyre, natyrisht, është
përqendruar tek bashkësia kishtare e Gazës.