Papa në audiencën e parë të përgjithshme të 2009-tës: “Në se rrimë të bashkuar me
Krishtin, viti i ri do të jetë i mirë e i lumtur”.
(07.01.2009 RV)Papa mbajti sot
paradite, në Sallën e Palit VI në Vatikan, audiencën e parë të përgjithshme të vitit
të ri, duke vijuar katekizmin për Shën Palin. Si i përshëndeti të pranishmit, ardhur
nga mbarë bota, Benedikti XVI u kërkoi falje për zërin, që e kishte pakëz të ngjirur: “Të
dashur vëllezër e motra, për fat të keq më është ngjirur zëri, por megjithkëtë, shpresoj
se do të më kuptoni”. Më pas përsëriti urimet për vitin e sapofilluar: “Ta
përtërijmë zotimin për t’ia hapur Krishtit mendjen e zemrën, që të jemi e të jetojmë
si miqtë e tij të vërtetë. Shoqëria e tij do të bëjë që ky vit, pavarësisht nga vështirësitë
e pashmangshme, të jetë një kohë plot gëzim e paqe. Vetëm në se jemi të bashkuar me
Krishtin, viti i ri do të jetë i mirë e i lumtur”. Gjatë katekizimit, Papa
shpjegoi konceptin e Shën Palit për kultin shpirtëror; kult i ri që e nisi Krishti
mbi Kryq. Kulti i vjetër, me flijimin e bagëtive për faljen e mëkateve në tempullin
e Jeruzalemit, merr fund. Kulti simbolik zevendësohet me kultin e njëmendtë: tani
fajet e njerëzve i merr mbi vete vetë Biri i Zotit: “Në zemrën e tij shkrihet
masa e trishtë e së keqes së kryer nga njerëzimi e përtërihet jeta”. Jezusi
e pati paralajmëruar fundin e tempullit, duke kumtuar lartimin e një tempulli të ri,
që nuk do të ndërtohej nga duar njeriu – tempullin e korpit të tij të ngjallur. Ky
zhvillim – vijoi të shpjegonte Papa - mund të shkaktojë edhe keqkuptime. Kulti i vërtetë,
adhurimi i vërtetë është njeriu, që jeton sipas vullnetit të Hyjit, por që mund të
rrezikohet ta jetojë fenë vetëm shpirtërisht, duke u shkëputur nga bashkësia e besimtarëve.
Nga ana tjetër, kult i vërtetë është ta nderosh Hyjin në jetën konkrete, por me rrezikun
e kufizimit të fesë në një moralizëm, sipas të cilit njeriu mund ta bëjë gjithçka
vetë, përmes përpjekjeve të tij morale. Kulti i vërtetë shpirtëror – shpjegoi Papa
– është i mundshëm vetëm në se bëhemi një me Krishtin: “Duke jetuar
në bashkimin me Krishtin, realizuar përmes fesë e sakramenteve, pavarësisht nga mungesat
tona, ne bëhemi fli e gjallë: e kështu realizohet kulti shpirtëror”. Duke
jetuar në Krishtin, njeriu mund të bëhet, çka nuk mund të jetë kurrë vetëm me forcat
e veta, fli e gjallë, e pëlqyer nga Zoti. E këtu nuk është fjala për një kult thjeshtë
moralistik, por për një kult të vërtetë, flia e njëmendtë e të cilit janë veprat e
mëshirës: “Shën Agostini e sqaroi këtë mrekullisht mirë në librin e 10-të
të veprës së tij “Qyteti i Hyjit”. Po citoj këtu vetëm dy fraza: “Kjo është flia e
të krishterëve: shumë e një korp i vetëm në Krishtin”… “E tërë bashkësia (civitas)
e shpërblyer… i mblatohet Hyjit përmes Kryemeshtarit, që dhuroi vetveten”. Atëherë
mund të themi se detyra ‘meshtarake’ e Kishës – pohoi Papa – është kumtimi i Ungjillit,
për t’i bashkuar popujt në të vetmin korp të Krishtit të ngjallur, që bota vetë të
bëhet ‘lumnia e Zotit’: “Vetëdhurimi i Krishtit ka prirjen t’i tërheqë të
gjithë drejt bashkimit me Korpin e tij, për ta bërë kështu një gjithë botën. Vetëm
në bashkim me Krishtin, njeriun-model, një me Hyjin, bota bëhet ashtu si e dëshirojmë
të gjithë: pasqyrë e dashurisë hyjnore. Ky dinamizëm është i pranishëm në Eukaristi
– e po ky dinamizëm duhet ta frymëzojë e ta formojë gjithë jetën tonë”.