Rripi i Gazës: e ka fjalën diplomacia

(30.12.2008 RV)Dita e katërt e operacionit “Plumbi i shkrirë” në Gazë. Para se të mblidheshin në Paris, ministrat e jashtëm të Bashkimit Evropian, me një aksion diplomatik që ka për qëllim të vendosë armëpushimin e të lejojë mbërritjen e ndihmave humanitare në këtë zonë të Lindjes së Mesme, Izraeli paralajmëroi se ofensiva kundër Hamasit mund të zgjasë disa javë, por për momentin, faza e parë ka përfunduar. Fjala i takon diplomacisë, e cila ka filluar tashmë punën. Përveç Bashkimit Evropian, sot janë konsultuar telefonikisht edhe sekretari i përgjithshëm i OKB-së, Ban Ki Mun dhe krerët e tjerë të kuartetit për Lindjen e Mesme.
Ndërkaq, viktimat palestineze në Gazë kanë arritur në 363 vetë e 1.700 janë të plagosurit. Aviacioni izraelit ka goditur gati 400 objektiva. Përvijohet emergjencë humanitare për rreth 1 milion e gjysëm palestinezë, megjithëse Tel Avivi ka autorizuar kalimin e rreth njëqind kamionëve me ndihma. Egjipti ka deklaruar se do ta mbajë të mbyllur kufirin me Rripin e Gazës, derisa Autoriteti Kombëtar Palestinez të marrë sërish në duar pushtetin. Nga ana tjetër, Hamasi ka qëlluar sërish me raketa qytetet izraelite, duke shkaktuar deri tani, pesë viktima.