Patrikët e krishterë: të ndalë dhuna në Rripin e Gazës e të kthehet dialogu. Intervistë
me Rojtarin e Tokës Shenjte.
(30.12.2008 RV)Kisha e Tokës Shenjte
dhe krerët e krishterë të rajonit ndjekin “me shqetësim të thellë e trishtim” luftimet
që përgjakin Rripin e Gazës. Në një Deklaratë të përbashkët, nënshkruar sot, tre Patrikët,
ai latin, ai greko-ortodoks dhe ai armen apostolik, shprehin dhimbjen e tyre të thellë
për ciklin e ri të dhunës ndërmjet izraelitëve dhe palestinezëve dhe për mungesën
e vazhdueshme të paqes në Tokën Shenjte. Ata i ftojnë të gjitha palët të heqin dorë
nga dhuna, por sidomos u bëjnë thirrje fraksioneve të ndryshme palestineze të mbrojnë
popullin, përtej interesave të tyre. Gjithashtu, Patrikët i kërkojnë bashkësisë ndërkombëtare
të ndërhyjë menjëherë për të ndaluar derdhjen e gjakut e për të gjetur një zgjidhje
të bazuar mbi rezolutat ndërkombëtare. Një nga nënshkruesit e Deklaratës është Rojtari
i Tokës Shenjtë, atë Pierbatista Picabala. Ta dëgjojmë: Jetojmë në një periudhë
tensioni të madh. Është e vërtetë se këtu në Çisjordani jemi relativisht larg nga
sa po ndodh, në kuptimin që bombat nuk i shohim e nuk i dëgjojmë, por në krejt popullatën
civile, sidomos ndër arabo-palestinezët, ndihet një zemërim i madh. Këtu,
i ashtuquajturi proces i paqes fillon e ndërpritet vazhdimisht: nuk është hera e parë
që jemi afër kthesës e pastaj ajo nuk realizohet. Kam frikë se edhe në këtë rast jemi
brenda një skenari të shkruar më parë: gjithçka dukej gati për ndryshime, e pastaj
u kthyem tek zgjidhja më e thjeshtë, dhuna. Dhunë që më duket tepër e shpërpjestuar,
e jashtëzakonshme. E sigurtë është se ata që paguajnë dhe vuajnë më shumë janë gjithnjë
njerëzit e varfër. Nuk besoj se mund të zgjidhen kështu problemet. Ç’mund
të bëjë bashkësia ndërkombëtare? A është e mundur ta ndryshojë situatën? Natyrisht
duhet ta ndryshojë situatën: roli i bashkësisë ndërkombëtare është shumë i rëndësishëm,
sepse mund të bëjë presion e t’i ftojë palët të tregohen më të matur. Fatkeqësisht,
bashkësia ndërkombëtare mungon prej shumë kohësh e mendoj, se edhe nëse dëshiron të
ndërhyjë tani, kjo do të kërkojë kohë. E koha këtu, është një faktor vendimtar. E
vërtetë është edhe se shumë kanë provuar më parë të ndërhyjnë, por pastaj kanë hequr
dorë duke thënë se situata është tepër e ndërlikuar. Kjo është e vërtetë, por nga
ana tjetër, është e vështirë të gjenden zgjidhje kur dy palët në konflikt – Izraeli
e palestinezët – janë kaq larg njëri nga tjetri.