Kisha përgatitet të kremtojë Krishtlindjen: Papa kryeson Meshën e Mesnatës në Bazilikën
e Vatikanit.
Kisha përgatitet të kremtojë Krishtlindjen. Nesër Benedikti XVI do të kryesojë Meshën
e Mesnatës në Bazilikën e Shën Pjetrit. Të gjithë besimtarët katolikë mund të jenë
shpirtërisht të pranishëm ku rreh zemra e Kishës katolike, sepse Mesha do të transmetohet
në mondovizion. Të nesërmen, nga Lozha qëndrore e Bazilikës së Vatikanit, në orën
12. 00, bekimi ‘Urbi et Orbi’ – ‘Romës e Botës’. Dy ditë para festës së madhe
Kisha i fton bijtë e saj të reflektojnë mbi mënyrën e tyre të jetesës në këto kohë
të trazuara nga kriza ekonomike. Zëri i saj u kujton të gjithëve se kjo krizë lindi
pikërisht nga idhujtaria e parasë. Kjo ndoshta do ta nxisë njerëzimin ta rrëzojë këtë
idhull nga piedestali i zemrave, natyrisht pa e demonizuar konsumin, sepse pa të
ekonomia vdes. E askush nuk duhet të harrojë se pasuritë e Planetit duhen ndarë në
në mënyrë të barabartë, sepse Zoti nuk i krijoi për pak njerëz, por për të gjithë!