365 ditë: Satoko Kitahara, një aristokrate japoneze ndërmjet leckashitësve.
(23.12.2008 RV)Shkandull! Aristokracia japoneze është thellësisht e shkandulluar.
Satoko, bija e profesorit të pasur Kitahara, rrëmon ndër kazanet e plehrave! Prej
disa ditësh Satoko ndihmon shitësit e rrobave të vjetra në Qytetin e milingonave.
Sillet e përsillet nëpër rrugët e periferisë duke mbledhur bashkë me ta lecka, kartona
e gjithfarë hedhurinash. Pastaj rikthehet në qytet, ku Osava, një sipërmarrës i falimentuar,
e ble mallin me peshë. Satoko e zbuloi Qytetin e milingonave me ndihmën e atit
françeskan, Xenonit. Me të shkoi për herë të parë në lagjen e barakave, ndër rrethinat
e Tokios. Këtë lagje e krijoi Osava i cili, së bashku me ndihmësen e tij, Matsui,
përpiqet me të gjitha mënyrat ta lehtësojë mjerimin e më të varfërve. E tmerruar nga
jeta që shikon me sy të vet në këtë qytet, Satoko nis menjëherë t’i ndihmojë fëmijët.
Por kjo nuk mjafton. Matsui e akuzon se nuk mund ta njohë jetën e qytetit, sepse jeton
në luks. “Në se ti je me të vërtetë dishepulle e Krishtit, do të ishe e varfër
e do të vuaje bashkë me të varfërit...”, i thotë. Atëherë Satoko nis të rrëmojë
nëpër kazanet e plehrave. Matsui mbetet me gojë hapur nga habia e Osavës i mbushen
sytë me lot. Asnjeri prej tyre nuk është i krishterë, por feja e kësaj vajze i prek
në thellësi të shpirtit. Për fat të keq, Satoko është shëndetligë e jeta në Qytetin
e milingonave e ligështon më tej. Duhet të thithë ajër të pastër, për të mjekuar
tuberkulozin, që ka nisur t’ia brejë mushkëritë. Kështu i duhet të largohet nga Qyteza
e bubrrecave. Kur kthehet, pas gjashtë muajsh, vendi i saj pranë fëmijëve është zënë
nga një zonjë e përgatiur për punën me të miturit. Satoko duhet të dorëzohet. Në se
ky është plani i Zotit, ajo do t’i nënshtrohet pa fjalë. Besonte se Zoti e kishte
thirrur për të bërë punë të mëdha, ndërsa tani mendon se gjithçka bëri, s’ishte tjetër,
veçse gabim. E pra, pa e vënë re fare, Satoko luajti një rol themelor. Me shembullin
e saj e me dëshirën për t’ia dhuruar plotësisht vetveten të tjerëve, fitoi shpirtin
e dy njerëzve. Osava e Matsui kërkojnë të bëhen të krishterë e marrin Pagëzimin.
Kur vrapojnë për t’i dhënë Satokos lajmin e gëzuar, gjejnë mjekët e familjarët të
dëshpëruar. Tuberkulozi ka përparuar, fundi është fare pranë.... E Satoko do të
vdiste në Qytetin e milingonave, në një dhomë me mure kompensate, ku do të shuhej
duke u lutur për Qytetin e për leckashitësit e tij. Satoko vdiq më 23 janar 1958.
Ishte vetëm 29 vjeçe.