Паніхіда пасьля сьмерці выдатных беларускіх сьвятароў, якіх гадавіна адыходу ў неба прыпадала нядаўна

Супрацоўнікі беларускае рэдакцыі Ватыканскага Радыё ( значыць наш невялікі беларускі калектыў) былі прысутнымі на паніхідзе за іхнія душы, якую адслужыў у рымскай Царкве Сьвятога Антонія, пры каледжы “Руссікум” Апостальскі Візітатар для беларускіх грэка-католікаў, Архімандрыт Сяргей Гаек, у саслужэньні кіраўніка беларускае праграмы айца Клаўдзія Робінэ ды ераманаха Лявонція, які вычыцца на Усходнім Інстытуце тут у Рыме. Быў таксама прысутны сэмінарыст з грэцкае калегіі ды дачка Марыяна Пецюкевіча, якога ўспаміны з побыту ў Рыме мы чытаем кожнае суботы, Марыя; як таксама прысутнічалі і звычайныя вернікі гэтае Царквы.
Мы усе разам успамянулі 30-ю гадавіну сьмерці монсынёра Пётры Татарыновіча, заснавальніка нашае беларускае праграмы Ватыканскага Радыё, 65-я ўгодкі сьмерці айца Антона Неманцэвіча, езуіта, першага беларускага Экзарха, як таксама ўспомнілі біскупа Чэслава Сіповіча, айца Льва Гарошку ды 12-ю гадавіну сьмерці айца Рабэрта Тамушанскага, які больш за 40 гадоў свайго жыцьця прысьвяціў служэньню Беларускай Царкве і справе беларускасьці.
Ён пахаваны на могілках “Прыма Порта” Вечнага Гораду непадалёк магілы айца Пётры Татарыновіча, які амаль 59-ць гадоў таму назад запачаткаваў беларускую сэкцыю на Ватыканскім Радыё.
На заканчэньне трэба яшчэ сказаць, што вельмі прыгожа сьпяваў хор Царквы Сьвятога Антонія пад кіраўніцтвам айца Людовіка Піхлера