Papa në lutjen e Engjëllit të Tënzot reflektoi mbi misterin e mishërimit dhe i ftoi
të gjithë ta shijojnë gëzimin e ardhjes së Jezusit.
(22.12.2008 RV)Ligjet e natyrës
duhet të jenë nxitje për të kundruar veprat e Zotit: BenediktiXVI, në lutjen
e Engjëllit të Tënzot foli edhe për rolin që luan astronomia në matjen e kohëve të
lutjes dhe –pak ditë para Krishtlindjes - i ftoi të gjithë besmitarët të përgatiten
për ta pritur me gëzim Shëlbuesin.
Një leksion jo i zakonshëm astronomie i
Papës! Në lutjen e Engjëllit të Tënzot, Benedikti XVI e nisi reflektimin e tij nga
tema e Lajmërimit të Zojës së Bekuar – sipas Ungjillit të së dielës së IV të Kohës
së Ardhjes – mister tek i cili rikthehemi çdo ditë, duke thënë lutjen e Engjëllit
të Tënzot, uratën që na bën ta rijetojmë çastin vendimtar, në të cilin Hyji trokiti
në zemrën e Marisë e, si mori ‘po’-në e Virgjërës, nisi të mishërohej në të e prej
saj. Pak ditë para Krishtlindjes, Papa i ftoi të gjithë besimtarët të reflektojnë
për misterin e patregueshëm, që Maria e mbajti nëntë muaj në kraharorin e saj virgjëror:
“Misteri
i Hyjit, që bëhet njeri! Është kjo baza e parë e shpërblimit. E dyta është vdekja
edhe ngjallja e Jezusit, e këto dy baza të pandarshme, janë shprehje e të vetmit
plan të Hyjit: të shpëtojë njerëzimin e historinë e tij , duke marrë plotësisht mbi
vete, deri në fund të fundit, të keqen që e shtyp”.
Mister
i shëlbimit i cili, përveç përmasës historike, ka edhe përmasën e vet kozmike: Krishti
– nënvizoi Ati i Shenjtë - është dielli i hirit që, me dritën e tij, e shndërron
dhe e ndrit universin në pritje. E vetë festa e Krishtlindjes – shpjegoi Benedikti
XVI- – lidhet me solsticin apo fillimin e dimrit, me të cilin nis zgjatja e ditëve
në hemisferën veriore, duke filluar nga 12 deri më 21 dhjetor. Benedikti XVI kujtoi
edhe se Sheshi i Shën Pjetrit është një sahat diellor, pikërisht atje ku obelisku
lëshon hijen e vet – më e gjata e vitit në këto kohë – në një vijë që vërehet mbi
kalldrëm, drejt shatërvanit nën dritaren e Papës. Kjo, për të theksuar rolin e astronomisë
në matjen e kohëve të lutjes, ashtu si lutja e Engjëllit të Tënzot, që kumbon në agim,
në mesditë e në muzg të ditës; prandaj në lashtësi mesdita e vërtetë përcaktohej me
orën diellore e sipas saj rregulloheshin sahatët. Papa shfrytëzoi kështu
rastin për të kujtuar se viti 2009 është shpallur Vit botëror i astronomisë, me rastin
e katërqind vjetorit të vrojtimeve të para me teleskop të Galileo Galileit. Të shumtë
– kujtoi më pas Ati i Shenjtë - qenë edhe papët që u morën me këtë shkencë, si Silvestri
II, që i dha edhe mësimin e astronomisë; Gregori XII, nga i cili kemi kalendarin e
sotëm e Shën Piu X, që dinte të ndërtonte sahatediellore.
"Në
se qiejtë, sipas fjalëve të bukura të Psalmistit, “rrëfejnë lavdinë e Hyjit”, edhe
ligjet e natyrës, të cilat në rrjedhë shekujsh shumë burra e gra të shkencës i bënë
të kuptohen gjithnjë më mirë, janë një nxitje e madhe për të kundruar me mirënjohje
veprat e Zotit”.
Duke u rikthyer tek tema e Krishtlindjes
- përfundoi Papa – të mësojmë nga Jozefi e Maria të fshehtën e lutjes, për ta shijuar
kështu, me fund, gëzimin e pritjessë Jezusit:
“Të përgatitemi për
ta pritur me fe Shëlbuesin, që vjen të rrijë me ne, Fjalë e dashurisë së Hyjit për
njerëzimin e të gjitha kohëve”.
Pas lutjes, ndërmjet përshëndetjeve
drejtuar shtegtarëve nga mbarë bota, Papa kujtoi posaçërisht 50 meshtarët e rinj Legjionarë
të Krishtit, shuguruar një ditë më parë nga kardinali Anxhelo Sodano në bazilikën
romake të Shën Palit jashtë Mureve si dhe shoqatën palermitane “Trëndafili i verdhë’,
që ka realizuar një vepër teatrale, të frymëzuar nge jeta e Don Pino Puljisit, vrarë
nga mafia 15 vjet më parë.