365 ditë: "Zhak e Loransë dë Burbo Bysè, model për të gjithë bashkëshortët"
(20.12.2008 RV)Zhak e Loransë dë Burbo Bysè + e deshën njëri-tjetrin me gjithë
zemër. U takuan në Paris gjatë Luftës II Botërore e shumë shpejt vendosën të martohen
e të kenë shumë fëmijë. Por historia e tyre nuk është e zakonshme. Zhak dë Burbo Byse
e gruaja tij u bënë të njohur në mbarë botën. Këta dy njerëz, që duheshin kaq shumë,
e kuptuan se Zoti ishte i pranishëm në dashurinë e tyre e i ruante gjithnjë. Në vitin
1956 Zhaku e la postin e tij dhe karrierën premtuese në ministrinë e jashtme, për
t’iu kushtuar plotësisht dashurisë për Loransen, me bindjen se kështu do të jepte
dëshminë e dashurisë së Zotit për njerëzit. Nga librat, që e bënë të famshëm, kuptohet
se martesa e Zhakut e Loransës është histori e dy njerëzve që u deshën çdo ditë e
më shumë, për gjithë jetën, pa asnjë lëkundje, sepse Zoti ishte burimi, modeli e qëllimi
i dashurisë së tyre. Zhak e Loransë vendosën të jetonin njëri për tjetrin, t’ia dhuronin
plotësisht veten njëri-tjetrit, ta vinin gjithnjë tjetrin në vendin e parë, të viheshin
në shërbim të tjetrit, ashtu si porosit Jezusi. E jashtëzakonshme? Jo, aspak, të gjithë
bashkëshortët duhet të jetojnë kështu. Zhak e Loransë janë shembull i një çifti,
që e përballoi me guxim të madh, e me sukses të madh, aventurën e martesës. Jetuan
– siç shkroi Zhaku – “një dashuri pa kthim!” Pastaj më 1986 Loransë vdiq. Pikërisht
në këtë kohë Zhaku shkroi librin “Letër Loransës”, përmes të cilit i drejtohet shoqes
së jetës, ndonëse letra shkruhej për t’u botuar. Në se ky libër u bë kaq i famshëm,
kjo ndodhi sepse Zhaku flet me thjeshtësinë më të madhe për dashurinë, si ndjenjë
e thellë shpirtërore që, kur është e vërtetë, i bën ballë edhe vdekjes. E nuk është
aspak e lehtë t’u flasësh të tjerëve për dashurinë. Madje nganjëherë është vështirë
t’i flasësh edhe njeriut që do. Në këtë letër drejtuar gruas së vdekur para pak kohe,
Zhaku i flet zemrës së saj e zemrës së njeriut. E gjithë Letra është një këngë falënderimi
për Loransën. Aq sa, pasi ta kesh lexuar, nuk mund të mos jesh një mendjeje me atë
që i shkroi një nga miqtë autorit: “Ajo që do të mbetet nga ti, do të jetë porteti
i saj”.Dëshmi mahnitëse e një martese vërtetë të krishterë, në të cilën prova më e
bukur e dashurisë është të japësh jetën për tjetrin.
+ Zhak
dë Burbo Byse është emri i penës i shkrimtarit dhe diplomatit francez, anëtar i Akademisë
franceze, Jacques de Bourbon, « comte de Busset ». Lindi më 27 prill 1912 në Paris
e vdiq më 7 maj 2001, gjithnjë në Paris. Vepra për të cilën folëm titullohet ‘Lettre
à Laurence’.