Rubrika 365 ditë: "Zhan Rodâ: lindja e Karitasit."
(16.12.2008 RV)Tani e tutje Marseli e miqtë e tij do të quhen ‘të pastrehët’
e Karitasit. Në këtë kohë, e jemi në vitin 1952, ky emër nuk ekziston ende. Këta njerëz
quhen thjeshtë vagabondë. “Ej, miq, po ju ju jap një lajm të mirë: sonte do të
flemë nën strehë”. “Kaq shumë ke pirë Marsel, sa të na premtosh edhe shtëpi?”.
Po pse na premton shtëpi e jo kështjellë, mbasi jemi që jemi? E, sidomos, pse nuk
na lë të flemë rehat tani e këtu ku jemi?”. “Po jo, Pol, është e vërtetë, të betohem!”
Sonte takova një mik, që më foli për një shtëpi, hapur pak kohë më parë në lagjen
e Invalidëve. Pa mendo një herë: një shtëpi për njerëz si ne”. “Sigurisht, po hapkan
një shtëpi për ne në lagjen më luksoze të Parisit! E kush na e paska hapur këtë shtëpi?
Shahu i Persisë?”. “Një prift që quhet Zhan Rodâ, i cili ka themeluar edhe një
lëvizje. Quhet Karitas e ekziston që më 1946. Vendosi ta krijonte, sepse në fund të
luftës mijëra njerëz mbetën si ne, në mes të rrugës. Humbën gjithçka: shtëpi, familje,
punë....Sivjet nisi veprimtarinë për të hapur shtëpi që strehojnë rrugaçë, që s’kanë
çati mbi kokë. Endacakë, si ne. Shokët e Marselit ia krisin gazit. “Një prift?!
E ty të gënjen mendja se do të na e hapë portën? Ne nuk jemi as të pagëzuar...Karitasi
yt është për katolikët!”. “Jo, nuk është aspak kështu! Shkova vetë për ta parë
me sytë e mi. Nuk doja të gënjehesha më kot. A e dini kush ma hapi portën? Ma hapi
vetë prifti. Më ngjalli menjëherë besim e shpresë. Kishte një fytyrë simpatike, nga
ato që të hyjnë menjëherë në zemër. I thashë: para se të ma hapësh portën, duhet
ta dish se nuk besoj. Mund të hyj tani?”. Ai buzëqeshi e unë e kuptova se nuk po tallej
me mua. Më tha: “Natyrisht që mund të hysh. Ne besojmë me gjithë zemër në Zotin, por
i ndihmojmë të gjithë, edhe ata që nuk besojnë, edhe të huajtë, sepse Zoti i do të
gjithë, edhe ata që nuk besojnë në Të. Atëherë vrapova t’ju thërres edhe ju. Hë, miq,
në këmbë, të nisemi!”. Sot, pas pesëdhjetë vjetësh, Karitasi francez është një
shoqatë shumë e madhe, që numëron më se shtatëdhjetë e pesë mijë vullnetarë, njerëz
që punojnë falas, e merr shumë dhurata në para: çdo vit ka më se një milion bamirës.
Falë këtyre të hollave, mund të ndihmojë mbi një milion e gjysëm njerëz në vit. Në
Francë ka dymijë e pesëqind shtëpi pritjeje, si streha që zbuloi Marseli. Por veprimtaria
e Karitasit shtrihet përtej kufijve francezë. Është një rrjet shumë i gjërë ndërkombëtar,
që ndihmon të varfërit në të katër anët e Planetit.