17 сьнежня ў сядзібе Эўрапейскага парлямэнту ў Страсбурзе адбудзецца ўручэньне
прэміі імя Андрэя Сахарава. Ляўрэатамі ўзнагароды штогод становяцца асобы, якія, на
думку эўрапейскіх палітыкаў, зрабілі найбольшы ўклад у абарону свабоды думкі. Сёлета
прэмія будзе ўручацца 20-ты раз. За дзень да ўручэньня прэміі ў Варшаўскім
унівэрсытэце адчынілася фотавыстава, прысьвечаная ўзнагародзе імя Сахарава – “Ад вольнай
думкі да свабоды”. Нэльсан Мандэла, Аляксандар Дубчэк, Ібрагім Ругова, Асвальда
Пая, Аляксандар Мілінкевіч – гэта толькі некаторыя з 20 ляўрэатаў прэміі Сахарава,
з фотыздымкамі й біяграфіямі якіх можна да 22 сьнежня пазнаёміцца ў фае Варшаўскага
ўнівэрсітэту. Аўтарамі выставы зьяўляюцца выбітныя сусьветнавядомыя фатографы й рэпартэры.
Сёлетнім ляўрэатам прэміі Сахарава стаў 34-гадовы кітайскі дысыдэнт Ху Джыа, абаронца
правоў чалавека, атывіст аховы навакольнага асяродзьдзя й барацьбы са СНІДам. Ху Джыа быў асуджаны на 3.5 гады турмы за, быццам бы, “падбухторваньне да дзяржаўнага
перавароту” У адкрыцьці выставы прымаў удзел Аляксандар Мілінкевіч, ляўрэат прэміі
Сахарава за 2006 год. Лідэр беларускай апазыцыі з гонарам узгадвае той факт, што асабіста
быў знаёмы з Андрэем Сахаравым. . Сярод імёнаў сёлетніх кандыдатаў
на прэмію імя Сахарава быў і экс-кандыдат у прэзыдэнты Беларусі, былы палітвязень
Аляксандар Казулін. Аднак прэмія гэтым разам дасталася не беларусам, якія, дарэчы,
двойчы за апошнія 5 гадоў былі ўганараваныя гэтай узнагародай. У 2004 годзе яе атрымала
старшыня Беларускай асацыяцыі журналістаў Жана Літвіна, а ў 2006 годзе – Аляксандар
Мілінкевіч.