Të krishterët e Indisë i kërkojnë kryeministrit t'i mbrojë
(15.12.2008 RV)Bashkësia kishtare indiane i kërkon qeverisë së Nju Delhit mbrojtje
për të krishterët në Orisë e garanci për kremtimin e qetë të festave të fundvitit.
Peticioni promovohet nga Forumi Kombëtar i të Krishterëve të Bashkuar dhe mban firmën
e kryeipeshkvit të Delhit, imzot Vinsent Konsesao dhe të ipeshkvit metodist Taranat
S. Sagar, kryetar i këshillit kombëtar të kishave në Indi. Duke iu drejtuar kryeministrit
Manmohan Sing, Forumi kërkon të ndalet dhuna kundër të krishterëve e të parandalohen
probleme të tjera. Ndër masat, që duhet të marrë qeveria, sipas nënshkruesve të peticionit,
është edhe shpërndarja e organizatës Bajrang Dal, krahu rinor i lëvizjes radikale
hinduisteVishua Hindù Parishad. Peticioni përkon me skadimin e ultimatumit të kësaj
lëvizjeje. Pikërisht, nacionalistët hinduistë kanë kërcënuar se do të zhvillojnë manifestime
e greva për Krishtlindje, nëse deri më 15 dhjetor, pra sot, nuk do të kapeshin përgjegjësit
për vrasjen e liderit të lëvizjes, më 23 gusht. Kujtojmë se që nga ajo datë, filluan
pogromet kundër të krishterëve në Orisë e në zona të tjera të Indisë. Autoritetet
kanë arrestuar 5 vetë, por sipas hindusitëve përgjegjësit e vrasjes janë 20.