Ekumenizmi: Papa pergezon per hapat domethenes ne idalohun me Kishat ortodokse
(12.12.2008 R.V.)Në takimin e sotëm në Vatikan me pjesëmarrësit e Mbledhjes
Plenare të Këshillit Papnor për Nxitjen e Bashkimit të të Krishterëve, Papa Benedikti
XVI nënvizoi hapat e rëndësishëm që janë bërë në fushën e marrëdhënieve me Kishat
ortodokse. Duke përmendur temën e Asamblesë “Pranimi dhe e ardhmja e dialogut ekumenik”,
Papa Racinger kujtoi ecurinë e bërë në udhën drejt bashkimit të plotë ndërmjet të
krishterëve e vuri në pah vlerën e dokumentit të fundit të Komisionit të Përzier ndërkombëtar
për dialogun teologjik ndërmjet Kishës katolike e Kishave ortodokse mbi “bashkimin
kishtar, udhëzimet konciliare e autoritetin”. “...ky dokument me siguri hap perspektiva
pozitive të reflektimit mbi marrëdhëniet që ekzistojnë ndërmjet primatit e sinodalitetit
në Kishë, argument ky me rëndësi thelbësore në marrëdhëniet me vëllezërit ortodoksë,
e që do të jetë objekt i thellimit dhe ballafaqimit në mbledhjet e ardhshme”. Ekumenizmi
– pohoi më tej Papa Benedikti XVI - na nxit në një shkëmbim vëllazëror e bujar të
dhuratave, sepse Ekumenizmi është “zemra e gjallë” që rreh për një bashkim të plotë
në fe “në sakramente e në mbarështim”. E kësaj duhet t’i afrohet e bashkohet dashuria: “Dashuria
do ti ndihmojë të krishterët ta kultivojnë në të vërtetën ‘etjen’ e bashkimin të plotë
e, duke ndjekur pa kundërshtuar frymëzimin e Shpirtit Shenjt, mund të shpresojmë të
arrijmë bashkimin e dëshiruar një ditë që vet Zoti e do”. Së fundit Papa bëri thirrje
që përveç udhëve e shtigjeve që deri më tani janë përshkuar, të kërkohet udhë të reja
për të vazhduar matej “udhën drejt bashkimit të plotë ndërmjet të krishterëve”.