Sot Kisha katolike kremtoi të Dielën e dytë të Kohës së Ardhjes.
(07.12.2008 RV)Kësaj kohe Papa
i kushtoi një lutje prekëse në audiencën e përgjithshme të së mërkurës së kaluar,
duke i ftuar përsëri besimtarët të përgatiten për Ardhjen, misteri më i lartë i dashurisë
së Zotit, që i solli njerëzimit shërimin. Zoti hyri vetë në histori. Burimit të përhershëm
të së keqes, i kundërvuri burimin e pastër të së mirës. E kjo vetëdije bëri që nga
zemra e Benediktit XVI të shpërthente vetvetiu lutja: “Eja, Jezus;
eja, jepi forcë dritës e mirësisë; eja atje, ku sundon gënjeshtra, mosnjohja e Zotit,
dhuna, padrejtësia; eja, o Zot Jezus, jepi forcë së mirës në botë e ndihmona të jemi
mbartës të dritës sate, veprimtarë të paqes sate, dëshmitarë të së vërtetës sate.
Eja, Zot Jezus!”. E Kohës së Ardhjes iu kushtua edhe predikimi
i parë i Atë Raniero Kantalamesës, mbajtur të premten e kaluar në Kapelën e Nënës
së Shëlbuesit në Vatikan, në praninë e Papës e të bashkëpunëtorëve të tij më të ngushtë.
Predikatari i Shtëpisë Papnore foli kryesisht për shndërrimin e Shën Palit, duke kujtuar
takimin e Palit me Krishtin, takim që ia ndryshoi krejtësisht rrugën e jetës. E duke
e lidhur predikimin me Kohën e Ardhjes, predikatari theksoi:
“Çdo propozim
fetar nis duke u treguar njerëzve ç’duhet të bëjnë për t’u shëlbuar ose për t’u ndriçuar.
Krishterimi nuk fillon duke u mësuar njerëzve ç’duhet të bëjnë, por duke u treguar
ç’ bëri Zoti për ta në Krishtin Jezus".
E më pas
nënvizoi se për të bërë një jetë vërtetë shpirtërore, nuk është e nevojshme të kryhen
vepra të mëdha: përkundrazi, duhen bërë gjëra krejt të thjeshta. Duhet të përgatitemi
për Mbretërinë e Hyjit si fëmijët, ashtu siç na porosit vetë Jezusi: “Pse
Jezusi e mori si model fëmijën? Sepse fëmija kërkon gjëra, por nuk pretendon se i
meriton, mbasi ka sjellë në shtëpi rrogën. E di se pasuria e tij janë prindërit, që
e duan, e kjo i mjafton. Pikërisht këtë vetëdije na kujton Krishti Fëmijë!”.