Më 10 dhjetor në Vatikan, kremtim solemn me rastin e 60-vjetorit të Deklaratës Universale
të të Drejtave të Njeriut.
(04.12.2008 RV)“Të drejtat e njeriut
janë shprehje e dinjitetit të patjetërsueshëm të çdo njeriu e shprehin thirrjen e
tij unike e të papërsëritshme, përtej çdo ndryshimi e diskriminimi të mundshëm”. Deklarata
Universale e të Drejtave të Njeriut e 1948-tës, që sanksionoi e përcaktoi këto të
drejta, përbën një gur kilometrik të qytetërimit njerëzor, duke pohuar se progresi
nuk matet vetëm me përparimin e shkencës, të teknikës e të ekonomisë, por edhe e sidomos,
me përparësinë e vlerave shpirtërore e progresin e jetës morale”. Këtë pohon, në një
notë, Këshilli Papnor i Drejtësisë e Paqes duke nënvizuar se qëllimi kryesor i kremtimit
solemn nga ana e Selisë së Shenjtë është pikërisht ‘të ripohojë këto vlera e këto
parime”. “Kisha – vijon nota - mendon se të drejtat njerëzore shprehin dinjitetin
e mbinatyrshëm të njeriut, e vetmja krijesë që Zoti e deshi për vete, qëllim e kurrë
mjet, e mendon se miratimi i Deklaratës Universale të të Drejtave të Njeriut në vitin
1948, ishte një çast me vlerë të jashtëzakonshme, që i krijoi njerëzimit mundësinë
për të fituar pjekurinë e ndërgjegjes morale në përkim të plotë me dinjietin e njeriut”.
Sipas njoftimit të dhënë nga Salla e Shtypit e Selisë së Shenjtë më 13 nëntorin
e kaluar, Kremtimet do të hapen më 10 dhjetor, në orën 16. 00, me aktin përkujtimor
reflektues e studimor. Të pranishëm - krerët e dikastereve të Kuries dhe Trupi Diplomatik
i akredituar pranë Selisë së Shenjtë, që do të reflektojnë për aktualitetin e Deklaratës.
Ndërmjet atyre, që do të marrin fjalën, janë sekretari i Shtetit të Vatikanit, kardinali
Tarçizio Bertone dhe drejtori i përgjithshëm i Organizatës Botërore të Punës, Juan
Somavia, ndërsa pritet të jenë të pranishëm edhe presidenti italian, Gjorgjio Napolitano
si dhe Princi e Mjeshtri i Madh i Urdhërit Sovran Ushtarak të Maltës, vëllau Metju
Festing. Pas aktit përkujtimor, në praninë e Benediktit XVI, dirigjentia e mirënjohur
spanjolle, Inma Shara, do të drejtojë koncertin organizuar nga Orkestra Simfonike
e Frankfurtit. Është gruaja e parë që drejton një kompleks simfonik në Vatikan. Pak
para koncertit pesë personaliteteve dhe institucioneve, që shquhen në fushën e impenjimit
shoqëror e të luftës për paqen, do t’u dorëzohen çmimet e përgatitura nga Fondacioni
i Shën Mateut për kujtim të kardinalit Van Thuan.