Një financë e qëndrueshme, për një zhvillim të qëndrueshëm: në Konferencën e Dohës,
imzot Çelestino Miliore kërkon të respektohet zëri i më të varfërve.
(02.12.2008 RV)“Kriza financiare
dhe kërcënimet e terrorizmit, nuk duhet ta shkëpusin vëmendjen e bashkësisë ndërkombëtare
nga nevojat e më të varfërve në botë”. Kështu u shpreh kryeipeshkvi Çelestino Miliore,
vëzhgues i përhershëm i Selisë së Shenjtë pranë Kombeve të Bashkura në Nju Jork, gjatë
fjalimit që mbajti dje në Konferencën e Dohës, në Katarr, thirrur nga OKB-ja për të
diskutuar rreth temës së financimit të zhvillimit. Mbi kokat tona në Doha, dyndet
një re e zezë - me këto fjalë e nisi diskutimin e tij kryeipeshkvi Miliore – është
ankthi që shkaktojnë pasojat ekonomike e politike të krizës së pashembullt financiare
dhe prania e vazhdueshme shkatrrimtare e terrorizmit, siç e dëshmuan ngjarjet tragjike
të Mumbait, në Indi. Këto kriza – vërejti prelati – përbëjnë një sfidë tepër të madhe,
që duhet t’i nxisë të gjithë të merren më shumë me nevojtarët.
Në rrënjët e
saj – sqaroi vëzhguesi i përhershëm i Selisë së Shenjtë – kriza financiare nuk është
aq dështim i mendjes njerëzore, sa i sjelljes morale. E për fat të keq, të gjithë
po i shohin efektet e lakmisë për t’u pasuruar sa më shpejt e të mungesës së maturisë.
Kështu që ata, të cilët s’ka shumë që dolën nga varfëria, tani ka shumë mundësi të
bien në një varfëri të re.
Ne flasim shpesh për zhvillim të qëndrueshëm - shtoi
imzot Miliore - dhe e bëjmë këtë, sepse duam të plotësohen nevojat e së tashmes,
pa dëmtuar mundësitë e breznive të ardhshme për plotësimin e nevojave të tyre. Po
kështu – vijoi prelati – edhe financa e qëndrueshme duhet të plotësojë nevojat e sotme
të kapitalit, duke siguruar njëkohësisht edhe ruajtjen e rritjen e burimeve me afat
të gjatë. Prej këndej, urimi i Selisë së Shenjtë që parimi i zhvillimit financiar
të qëndrueshëm të zbatohet në tregjet financiare. E kjo është edhe sfida e madhe e
Konferencës së Dohës: “As më pak e as më shumë, sesa të sigurojë, në mënyrë të qëndrueshme,
financimin e zhvillimit”.
Së fundi, një thirrje drejtuar bashkësisë ndërkombëtare,
të respektojë zërat e vendeve dhe të individëve, që kanë më shumë nevojë për ndihmë
financiare. Kështu edhe imzot Miliore kërkoi të ripërcaktohet roli i institucioneve
Breton Uuds si dhe që të ashtuquajturat G8 e G20 të dëgjojnë zërin e atyre, që kanë
më shumë nevojë për ndihmë në rrugën e zhvillimit.
Kujtojmë se Konferenca e
Dohës po analizon hapat e bëra deri tani për të arritur objektivat e Mijëvjeçarit,
për t’u garantuar kushte më të mira jetese popullsive më të varfëra dhe për të ndërmarrë
masa të tjera, që shërbejnë për të përballuar Krizën ekonomike botërore aktuale, e
cila ndikon sidomos mbi nevojtarët. Vetëm pak ditë para kësaj Konference, që përfundoi
sot, Vatikani, përmes një note të Këshillit Papnor për Drejtësinë e Paqen, miratuar
nga Sekretaria e Shtetit, mbajti qëndrim mbi temën e financës dhe të zhvillimit. “Për
të përballuar krizën duhet një pakt i ri financiar ndërkombëtar”, kërkohet në dokument,
i cili ngul këmbë edhe për rishikimin e rolit të tregjeve offshore, pra të tregjeve
që shfrytëzohen nga ndërmarrjet jashtë vendit, ku këto ndërrmarrje prodhojnë. Pikërisht
praktika e blerjes së shërbimeve jashtë vendit ka qenë një nga rripat e transmetimit
të krizës.Selia e Shenjtë këshillon që të forcohet bashkëpunimi për të vigjëluar mbi
sistemin financiar. Në veçanti, është e rëndësishme që konfrontimi politik ndërmjet
vendeve të pasura, të mos sjellë zgjidhje të bazuara mbi marrëveshje, ku përfshihen
vetëm ata. Këshilli Papnor vë në dukje se sistemi ekonomik botëror bazohet mbi dy
paradokse: “Janë vendet e varfëra ato që financojnë vendet e pasura, të cilat pasurohen
si përmes ikjes së kapitalit privat, ashtu edhe përmes vendimeve qeveritare për të
depozituar rezerva zyrtare në formën e aktiviteteve financiare të sigurta, në tregjet
offshore”. Pastaj, “paratë që dërgojnë emigrantët tejkalojnë ndihmat publike për zhvillimin.
Si të thuash, të varfërit e Jugut financojnë të pasurit e Veriut e po të varfërit
e Jugut janë të detyruar të emigrojnë në veri për të mbajtur familjet në Jug”. Nga
ana tjetër, tregjet offshore kanë lejuar ikjen e shumave të mëdha kapitalesh, të motivuara
nga dëshira për të mos paguar taksat e shpesh edhe për të pastruar paratë. Një rol
të rëndësishëm për zgjidhjen e krizës, sipas Selisë së Shenjtë, duhet të luajnë edhe
vetë qytetarët, duke u bërë më të përgjegjshëm në fushën e konsumit e të investimit.