365 ditë: "Alfred Shtanke, françeskani nën uniformën gjermane".
(26.11.2008 RV)Mbi burgun e Burzh, në zemër të Francës, bie nata. Shumë të
burgosur, mbyllur në qeli, i hapin mirë veshët. Trupat e tyre të martirizuar, mbledhur
kruspull, janë plot me plagë të freskëta, që kullojnë gjak. Thua do t’i marrin në
terrin e natës për t’i torturuar rishtas? Do t’i bëjnë ballë grushteve, shuplakave,
ulurimave e kërcënimeve të xhelatëve? Do të mund t’i durojnë talljet e përqeshjet
kur, në kulmin e torturës, nuk do të durojnë më e do të kërkojnë mëshirë? Vuajtjeve
fizike u shtohen ato morale. Disave nuk u kujtohet fare ç’kanë thënë e ç’kanë bërë
gjatë hetuesisë. Ndoshta i kanë tradhtuar miqtë e shokët, që luftojnë kundër pushtimit
nazist gjerman, e nuk e mbajnë mend fare. Apo ndoshta kanë mundur të qëndrojnë? Ku
ta dish! Në qelinë e errët dëgjohet një zhurmë. Një kyç rrotullohet në bravë. I
burgosuri plot plagë pëshpërit diçka të pakuptuar. Një njeri i shëndoshë, veshur
me uniformë gjermane, i afrohet. “Mos kij frikë, jam infermier gjerman, vëlla Alfredi
i urdhërit të Shën Françeskut. Jam këtu për të të mjekuar. I burgosuri mblidhet
lëmsh. Duhet të jetë një kurth i ri i kriminelëve, që e katandisen në atë gjendje.
Vëlla Alfredi i flet, ndërsa hap çantën, mbi të cilën bie në sy një kryq i kuq, e
pyet të plagosurin në se pranon ta mjekojë, e siguron se do t’ia lehtësojë dhimbjet.
I burgosuri, i mrekulluar nga ëmbëlsia e zërit, ngre sytë, shikon fytyrën e njeriut
që e lut.... lehtësohet e nis të qajë me dënesë. Vëlla Alfredi shkon qeli në qeli.
Disave u sjell lajme nga familjet, të tjerët i dorëzojnë letra, mesazhe për të njoftuar
të afërmit të ruhen nga rreziku i arrestimit. Me ndihmën e rojeve franceze, mjekon,
flet, dëgjon, rrëfen të gjithë ata që së shpejti do të pushkatohen, lutet me ta. I
këshillon edhe për qëndrimin që duhet të mbajnë gjatë hetuesisë. Disa mendojnë se
mund t’i gënjejnë xhelatët, duke shpikur gjithfarë historish. Por kjo bën efekt të
kundërt; e shton edhe më shumë mizorinë e ushtarëve. Pasi e kryen shërbimin e natës,
vëlla Alfredi shkon të takojë familjet dhe miqtë e të burgosurve.‘Françeskani i Burzh”
- kështu e thërresin të gjithë - mund të arrestohet nga çasti në çast. Në se do ta
kapin duke ndihmuar ‘terroristët’, ‘armiqtë e atdheut’, merret me mend ç’tortura të
rafinuara do të provojnë mbi trupin e tij. Kur këto mendime nisin t’ia turbullojnë
kokën, vëlla Alfredi e lëshon veten plotësisht në dorë të Zotit, i kërkon forcën e
duhur për të vijuar rrugën që ka nisur. E mendon hollësisht çdo veprim, që të mos
ngjallë kurrfarë dyshimi. Nuk ka frikë për jetën e tij, jo! Mendon se duhet të jetojë
akoma, sepse shumë njerëz kanë nevojë për ndihmën e tij. Mrekullisht vëlla Alfredi,
megjithë rreziqet e mëdha që përballon, nuk zbulohet asnjëherë nga xhelatët e burgjeve
hitleriane.